Acilino Branco Prontu Koopera Ho Prossesu Auditoria Bá Aktu Eleitorál

Hatutan.com, (23 Maiu 2023), Díli—Diretór Jerál Sekretariadu Tékniku Administrasaun Eleitorál (STAE), Acilino Manuel Branco prontu no sei koopera ho parte relevante hodi halo auditoria ba aktu eleitorál tomak ne’ebé la’o durante eleisaun Parlamentár 2023.

Diretór Jerál Sekretariadu Tékniku Administrasaun Eleitorál (STAE), Acilino Manuel Branco.

Prontidaun ne’e relasiona ho deklarasaun Prezidente Repúblika, José Ramos-Horta ne’ebé sei husu atu halo auditoria ba órgaun eleitorál sira, liu-liu STAE no iha Tersa (23/05/2023) Acilino deklara abertamente ba públiku katak prontu no sei koopera ho instituisaun relevante bainhira iha auditoria ba prosesu eleitorál ne’e.

Lee Mós: Prezidente Repúblika Sei Husu Auditoria ba Servisu Órgaun Eleitorál

Acilino Manuel Branco hateten hanesan institutusaun Estadu tenke koopera ho prosesu ne’ebé la’o iha Timor-Leste, maibé hakarak hato’o katak prosesu hotu-hotu ne’e lao tuir Lei, administrativamente iha aktu eleitorál tomak ne’ebé mak kontribui hodi rezulta eleisaun ida.

“Bainhira iha elementu ruma ne’ebé mak la tau insatisfasaun ba prosesu ne’ebé iha, prosesu eleitorál iha nia kanal atu lori fó reklamasaun ba prosesu sira ne’ebé mak iha. Maibé, ita hotu iha Estadu Direitu Demokrátiku, karik iha mós esforsu Estadu tomak oinsa atu bele buka hatene di’ak liután funsionamentu órgaun eleitorál nian ho di’ak. Hanesan institutusaun Estadu, iha ne’ebé de’it no bainhira prontu atu koopera,” nia hateten liu hosi konferénsia imprensa ne’ebé hala’o iha edifísiu STAE, Caiocoli.

Atu fó hanoin de’it katak, iha Timor-Leste adopta sistema mistu, katak STAE hanesan institutusaun ezekutadór, CNE hanesan órgaun supervizaun no última instânsi maka supremu Tribunál Justisa nu’udár órgaun ne’ebé aas liu atu foti desizaun ba aktu sira ne’ebé mak karik interessante sira la satisfas no karik iha indisiu ba irregularidades nia prosesu tenke liu hosi kanál sira ne’ebé iha, tuir sistema funsionamentu sistema eleitorál.

Durante eleisaun Parlamentár la detekta katak, elementu ruma ne’ebé komete hosi STAE maski iha kestaun lojistika mak iha naksalak oitoan maibé la prezudika prosesu eleitorál no eleisaun la’o ho susesu, demokrátiku tuir dalan legál.

Jornalista: Vito Salvadór