Sidadaun Na’in-rua Tenta Impede Servisu Autoridade Polisiál

Hatutan.com, (09 Juñu 2023), Díli—Polísia Nasionál Timor-Leste (PNTL), Komandu Munisipiu Bobonaro, kaptura no detein ona sidadaun mane na’in-rua ho inisiál OLD no NDP, tanba tenta atu hapara servisu operasaun autoridade polisiál iha terrenu.

Polísia Nasionál Timor-Leste (PNTL), Komandu Munisipiu Bobonaro, kaptura no detein ona sidadaun mane na’in-rua ho inisiál OLD no NDP, tanba tenta atu hapara servisu operasaun autoridade polisiál iha terrenu, Kinta (08/06/2023). Foto/PNTL.

Kapturasaun ne’e tanba, iha Kinta (08/06/2023) haleu tuku 23:22 kalan Otl, Ofisiál Polísia Suku (OPS) iha Suku Saburai ho OPS Suku Odomau, apoia hosi ekipa Servisu Investigasaun Kriminál (SIK), Esquadra PNTL Maliana, hala’o operasaun “joint patrol” iha tempu kalan ho objetivu atu kontrola kriminoza sira inklui garantia no estabiliza nafatin hakmatek bá populasaun.

Lee Mós: Deskonfia Oknum PCIC Baku Membru PNTL Ida To’o Grave

Infelizmente, operasaun ne’e to’o iha dalan entre Suku Odomau ho Saburai nian, ekipa operasaun konjunta, hetan impedimentu “hamriik taka estrada” hodi impede polísia ninia servisu.

Durante aktu impedimentu ne’e, sidadaun na’in-rua ne’e mós hasai lia-fuan aat halo insultu no tolok hasoru autoridade seguransa sira iha dalan.

Ho nune’e, membru PNTL sira ne’ebé hala’o operasaun iha kalan ne’e, tun hosi karreta hodi kaptura kedan sidadaun na’in-rua ne’e no polísia suspeita sira  bá kríme perturbasaun órden públika.

“Kazu ne’e hahú hosi joven na’in-lima ne’ebé halo perturbasaun órden públika tanba latan ai hodi taka estrada. Bainhira ekipa patrulla liu hodi muda sees tiha ai iha estrada klaran ne’e, sira tolok no sadik hodi dehan polisia atu tiru tok sira. Nune’e, ekipa servisu tun duni sira no kaptura suspeitu na’in-rua mak OLP no NDP. Enkuantu na’in-tolu seluk konsege halai,” Hatutan.com sita komunikadu.

Hafoin kaptura joven na’in-rua ne’e, ekipa operasionál kontakta kedan bá  Ekipa Patrulla Esquadra PNTL Maliana hamutuk ho Task Force, to’o iha lokál insidente, hodi transporta kedan suspeitu sira bá halo detensaun iha sela komandu PNTL Munisipiu Bobonaro, hodi kontinua halo prosesu identifikasaun.

Jornalista: Rogério Pereira Cárceres