Taur Matan Ruak Solidariza Populasaun Afetadu Hosi Dezastre Naturál

Hatutan.com, (06 Jullu 2023), Díli—Eis Primeiru-Ministru, Taur Matan Ruak sente triste haree notísias iha semana ne’e kona-bá akontesimentu dezastre naturais iha Kosta Sul País nian kauza hosi udan boot loron hirak ne’e nia laran, hodi estraga infraestruturas públiku no privadu lubuk ida inklui hamate sidadaun balun.

Uma komunidade ne’ebé hetan estragus hosi dezastre naturais iha aldeia Airacalau, Suku Aituto, Postu Administrativu Maubisse, Munisípiu Ainaro, hafoin udan boot durante loron tolu hahú hosi 03 to’o 05 Jullu 2023. Foto/Radio Comunidade Maubise.

Akontesimentu ne’e fó hanoin fali kona-bá kalamidade ne’ebé akontese iha 04 Abril 2021, ne’ebé kuaze destrói infraestruturas lubuk ida no hamate mós sidadaun balun.

Lee Mós: Ema Ida Mate, Uma 274 Estragadu Iha Munisípiu Sia

“Ha’u fiar katak IX Governu Konstitusionál liuhosi Primeiru-Ministru Xanana Gusmão orienta ona liñas ministeriais sira atu halo asaun emerjénsia imidiata ruma hodi salva ita-nia populasaun no sira nia bens inklui buka minimiza risku boot liutan,” Hatutan.com sita komunikadu ne’ebé fó-sai iha Kuarta (05/07/2023).

Ikus liu, Taur Matan Ruak hato’o sentidas kondolénsias ba família sira ne’ebé lakon sira nia ema iha dezastre ida-ne’e, no hato’o solidariedade boot ba família vítima sira ne’ebé afetadu iha dezastare ida-ne’e.

“Ha’u mós solidariza IX Governu no realsa iha situasaun sira hanesan ne’e, ita tenke hamutuk luta hodi rekupera, rehabilita no rekonstroi fali distruisaun hirak ne’ebé provoka hosi dezastre naturais,” Taur Matan Ruak fó solidariedade.

Jornalista: Rogério Pereira Cárceres