Kazu Oho Natalino iha Lospalos, Polísia Identifika Suspeitu Na’in-hitu

Hatutan.com, (10 Jullu 2023), Díli-Polísia Nasionál Timor-Leste (PNTL) Munisípiu Lautem, identifika  suspeitu hamutuk na’in-hitu (7) ne’ebé envolve iha kazu  oho Natalino Soares (20), iha área Kampu futeból 745, Postu Administrativu Lospalos Vila, Munisípiu Lautem.  

Foto/Ilustrasaun

Matebian Natalino, nu’udár estudante ida, iha eskola Sekundária Jerál Nino Konis Santana Lospalos, foin iha klase 12. Nune’e, iha Kuarta (06/07/2023), tuku 13:00, Otl, bainhira sai ona hosi eskola, atu fila-fali bá ninia uma, iha Aldeia Assalaino, Suku Fuiluro, Postu Administrativu Lospalos Vila.

Bainhira iha dalan bá uma, aserta  kedan iha konfrontu ida nia laran, ne’ebé mak envolve hosi juventude sira no Natalino Soares, hetan pankada maka’as iha parte ulun to’o rezulta lakon vida ka mate.

Portavós komandu jerál PNTL no atuál Xefe Departamentu Polísia Komunitária, Superintendente Polísia António da Luz dehan, suspeitu na’in-hitu (7) ne’e mak ho inisiál, hanesan  AVF (21), LE (19), NDJ (18), EDJT (19) ho JLN  (18), ANSP (19) ho EDJT (idade 19).

Instigadór sira iha komandu PNTL Munisipiu Lautém, konklui ona mós prosesu identifikasaun, no submete ona ninia autos sira bá iha Ministériu Públiku (MP), nu’udár na’in bá asaun penál, atu bele hasai mandadu detensaun bá suspeitu sira.

“Prosesu inisiál, halo ona, identifika ona suspeitu na’in-hitu (7), maibé ami hein mandadu detensaun hosi Ministériu Públiku,” António da Luz informa bá jornalista sira liuhosi konferénsia imprensa iha Kuartél Jerál PNTL, Díli, Segunda (10/07/2023).

 António da Luz hateten, prosesu bá kazu ne’e rasik, la’o daudauk ona iha Ministériu Públiku, PNTL hein de’it ministériu públiku mak iha kompeténsia, oinsá mak atu delega prosesu investigasaun ne’e bá instituisaun ida ne’ebé. Maibé, bá PNTL, koopera nafatin, hodi hein delegasaun kompeténsia sira, no polísia hala’o ninia kna’ar atu bele kontínua prosesa.

Kronolojia akontesimentu ne’e iha arredores  eskola, no depois sira lori malu to’o iha li’ur maka, sira hosi sidadaun balu, ne’ebé mak la’ós eskola iha ne’ebá, sira mós envolve hotu iha kazu ne’e, entaun, sira hein, ikus mai baku malu iha estrada, no rezulta Natalino mate.

Komandu PNTL Sei Prosesa Nia Membru

Relasiona ho akontesimentu kazu omisídiu ne’e, sasin balu, no família vitima sira lamenta kona-bá atuasaun polísia nian, tanba maske kazu ne’e mosu, Komandu PNTL ninia membru sira balu iha hotu lokál akontesimentu maibé la halo atuasaun ruma.

Komandu PNTL liuhosi komandante jerál Komisáriu Henrique da Costa, hasai ona despaxu ida bá Inspetór Jerál, atu kria ekipa ida, hodi halo investigasaun bá membru sira iha Lospalos, kona-bá servisu ne’ebé maka sira halo.

Kona-bá matebian Natalino nia isin mate, iha altura ne’ebá kedan, parte ambulánsia transporta kedan mai iha Ospitál Nasionál Guido Valadares (HNGV), Bidau-Díli, hodi submete bá autópsia. No prosesu ne’e, konklui ona, no entrega fila-fali ona mós bá família sira, hodi bá haloot iha rai moris fatin.

Jornalista: Rogério Pereira Cárceres