KM Aprova Rezolusaun Hodi Define Kompozisaun Komité Revizaun Polítika OJE 2024

Hatutan.com, (25 Outubru 2023), Díli—IX Governu Konstitusionál liuhosi Konsellu Ministru (KM), aprova ona projetu Rezolusaun Governu nian kona-bá definisaun kompozisaun Komité Revizaun Polítika bá Orsamentu Jerál Estadu (OJE) tinan 2024 nian.

Sorumutu Konsellu Ministru Ordináriu iha Palásiu Governu-Díli, Kuarta (25/10/2023). Foto: GPM.

Proposta Rezolusaun Governu nian ida-ne’e, aprezenta hosi Vise-Ministra Finansas, Felicia Claudinanda da Cruz Carvalho, iha sorumutu KM ordináriu, iha Palásiu Governu-Díli, Kuarta (25/10/2023).

Lee Mós: Governu Prevee OJE 2024 Billiaun $1,6

“Komité Revizaun Polítika mak iha kompeténsia hodi verifika alokasaun estratéjika kona-bá rekursu submisaun orsamentál nian, ho objetivu atu atinje kompromissu no objetivu sira ne’ebé hatuur iha dokumentu estratéjiku no análiza kapasidade atu ezekuta planu ba tinan finanseiru 2024 nian,” Hatutan.com sita komunikadu, Kuarta (25/10/2023).

Komité Revizaun Polítika ne’e sei prezide hosi Primeiru-Ministru, Kay Rala Xanana Gusmão no mós kompostu hosi Vise-Primeirus-Ministrus, Francisco Kalbuadi Lay no Mariano Assanami Sabino Lopes, Ministra Finansas (MF), Santina José Rodriguês Viégas Cardoso, Ministru Obras Públikas (MOP),  Samuel Marçal, no hosi Ministru Planeamentu no Investimentu Estratéjiku (MPIE), Gastão de Sousa.

Sekretária Estadu Igualdade no Inkluzaun (SEII), Elvina de Sousa Carvalho, Prezidente Institutu bá Defeza Direitus Labarik nian no reprezentante ida hosi Asosiasaun Defisiente Timor-Leste sei partisipa mós iha reuniaun sira Komité Revizaun Polítika nian, hanesan observadór.

Reuniaun Komité Revizaun Orsamentál nian sei hala’o hosi loron 24 fulan-outubru to’o loron 9 fulan-novembru, iha Auditóriu Ministériu Finansas nian.

Komité Revizaun Orsamentál tenke assegura kapasidade hodi ezekuta planu anuál bá servisus no entidades seitór públiku administrativu nian no ninia konformidade ho prioridade nasionál sira ne’ebé define ona bazeia bá Planu Estratéjiku Dezenvolvimentu 2011 – 2030, iha Programa Governu, planu ba médiu prazu no planu servisu anuál sira no entidade sira iha setór públiku administrativu, no iha dokumentu polítiku no estratéjiku sira seluk Governu nian.

Alokasaun dotasaun orsamentál sira bá kada servisu ka entidade, tenke tuir ninia planu anuál no respeita limite másimu despeza nian ne’ebé molok ne’e define ona bá kada títulu.

Selebra Istória, Harii Futuru

Iha sorumutu Konsellu Ministrus ohin, delibera ona hodi aprova tema “Selebra istória, harii futuru” bá komemorasaun 28 fulan-novembru iha tinan ida-ne’e, iha ne’ebé Timor-Leste selebra aniversáriu Proklamasaun Independénsia bá dala-48.

Ikusliu, Konsellu Ministrus aprova projetu Dekretu Governu, ne’ebé aprezenta hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, kona-ba apoiu ba  dezenvolvimentu seitór privadu.

Diploma ida-ne’e ho objetivu atu kria apoiu finanseiru espesiál ida bá asosiasaun sivíl sira sein fins lukrativus iha Timor-Leste, ne’ebé promove dezenvolvimentu setór privadu timoroan nian, ne’ebé harii no rejista ona asosiasaun sira-ne’e ho loloos iha loron ne’ebé diploma ida-ne’e hahú vigora.

Montante totál hosi kada apoiu labele liu valór másimu dolar amerikanu rihun 100 (atus ida) kada entidade benefisiária no ho limite mínimu dolar amerikanu rihun 25 (ruanulu-resin-lima).

Montante globál hosi apoiu finanseirus ne’ebé atu fó labele liu dolar amerikanu rihun 150 (atus ida limanulu).

Jornalista: Rogério Pereira Cárceres