Governu Nomeia Agostinho Letêncio Nu’udár Prezidente KFP Hodi Troka Faustino Cardoso

Hatutan.com (15 Novembru 2023) Díli—Liu hosi Sorumutu Konsellu Ministru (KM) iha loron 15 fulan Novembru, aprova ona rezolusaun Governu ne’ebé aprezenta hosi Primeiru-Ministru (PM), Kay Rala Xanana Gusmão, hodi nomeia Agostinho Letêncio de Deus nu’udár Prezidente Komisaun Funsaun Públika (KFP) troka Faustino Cardoso.

Prezidente KFP, Agostinho Letêncio de Deus. Foto doc Agostinho. 

Projetu Rezolusaun Governu hosi Primeiru Ministru ne’e, nomeia José Telo Soares Cristovão, Maria Domingas Alves no Agostinho Letêncio de Deus, atu ezerse mandatu ida bá tinan lima ho rejime dedikasaun eskluzivu, nu’udár Komissáriu Funsaun Públika.

Lee Mós: Xefe Estadu Enkoraza KFP Servisu ho Imparsiál

“Konsellu Ministrus mós deside hodi indika Agostinho Letêncio de Deus nu’udár Prezidente Komisaun Funsaun Públika,” Hatutan.com sita komunikadu, Kuarta (15/11/2023).

Agostinho Letêncio de Deus mós antes ne’e assume knaar hanesan Diretór Jerál Institutu Nasionál Administrasaun Públika (INAP).

Iha sorumutuk ne’e Konsellu Ministru mós aprova projetu Dekretu Governu ne’ebé aprezenta hosi Ministra Finansas, Santina José Rodrigues F. Viegas Cardoso, ba alterasaun daruak Dekretu Governu n.º 19/2022, iha loron 11 fulan Maiu, kona-bá klasifikadór orsamentál.

Jornalista: Leopoldina de Carvalho