FOKUPERS: Legalizasaun bá Servisu Sex Komersiál La Rezolve Problema HIV/SIDA

Hatutan.com, (28 Novembru 2023), Díli— Forum Komunikasaun bá Feto Timor Leste (FOKUPERS), konsidera ezijénsia hosi instituisaun relevante sira atu halo legalizasaun no lokalizasaun bá Servisu Sex Komersiál (Prostituisaun) iha Timor Leste (TL) sei la rezolve problema moras HIV/SIDA.

Diretora ezekutiva Fokupers, Maria Fatima Pereira Guterres. Foto/Hatutan.com

Assuntu ne’e hato’o hosi Diretora Ezekutiva FOKUPERS, Maria Fátima Pereira Guterres relasiona ho Institutu Nasionál Kombate Moras HIV/SIDA (INKSIDA) hala’o hela esforsu atu halo konsulta públika oinsa legaliza assuntu ne’e.

Lee Mós: Servisu Sex Komersiál Eziste, INKSIDA Esforsu Legaliza no Lokaliza

“Atu harii fatin bá prostituisaun iha Timor-Leste ne’e, tenke halo uluk estudu ida atu haree katak lokalizasaun ne’ebé mak halo ne’e nia iha benefisiu duni bá ema sira ne’ebé afetadu ona bá HIV/SIDA ka la’e. Tanba, dalaruma mós di’ak atu hari fatin prostituisaun ne’e hodi fásil kontrola, maibé atu halo kontroladu ne’e oinsa,” nia hateten ba Jornalista Hatutan.com.

FOKUPERS haree katak, bainhira iha lisensa atu lokaliza duni fatin bá prostituisaun ida-ne’e di’ak maibé ema balun sei sai vítima bá ida-ne’e tanba de’it nia presiza maibé laiha benefísiu ruma.

“Ida-ne’e laiha sentidu bainhira laiha kontrolu másimu tanba fatin lokalizasaun ne’e tau, entaun ema hotu ne’ebé mai bele halo sira nia servisu ho livre no tenke hetan kontrolu hosi parte saúde nian,” nia hateten.

Nia preokupa tanba ezijénsia ida-ne’e oinsa sira bele servisu hamutuk ho parte relevante sira tanba atu lokaliza prostituisaun ne’e atu foku de’it bá maluk sira ne’ebé mak afetada ba HIV/SIDA ka oinsa.

“Bainhira atu foku de’it bá sira ne’ebé mak hetan ona HIV/SIDA ha’u hanoin ida-ne’e la’ós solusaun tanba ita foku de’it bá ema sira ne’ebé mak kona ona moras ne’e, maibé la kontrola mane sira ne’ebé mai assesu iha liur. Ne’e signifika, sira mós lori moras bá mai bele da’et ba bebeik,” nia preokupa.

Ho situasaun ne’e maka, FOKUPERS rekomenda atu tetu buat hotu-hotu molok foti desizaun tanba bainhira laiha kontrolu maka moras HIV/SIDA kontinua buras bá beibeik iha Timor-Leste.

Jornalista Estajiáriu: Lazaro Pereira Quefi