Liquiça
Governu Gasta Millaun $3,5 bá Projetu Instalasaun Transformadór 20 MVA iha Liquiça
Hatutan.com (08 Dezembru 2023), Liquiça—Governu liu-husi Ministériu Obras Públika (MOP) ho Eletrisidade Timor-Leste, Empreza Públika (EDTL,E.P) lansa primeira pedra bá projetu instalasaun transformadór 20 Mega Volt Amper (MVA) iha sub-estasaun Liquiça, hodi nune’e bele aumenta tán enerjia atu fasilita kliente sira ho di’ak liu tán.
Lansamentu bá Projetu espansaun sub-estasaun liña eletrisidade iha Munisípiu Liquiça, 06 Dezembru 2023. Foto: Tomé da Silva.
Ministru Obras Públika, Samuel Marçal esplika, konstrusaun ne’e atu aumenta tán enerjia tanba iha Portu boot ne’ebé presiza enerjia makas.
Lee Mós: 2024, MOP Sei Rezolve Eletrisidade Mate-Lakan no Estrada
Alende ne’e, atu ajuda mós hodi salva estasaun iha Camea tanba iha Díli, lakleur tán edifísiu mesak boot-boot ne’ebé sei mosu tán.
“Ida-ne’e ita hahú hanesan urjente liu hodi hasa’e enerjia bá atendimentu nesesidade agora. Transforma no aumenta tan kapasidade ba iha sub estasaun Liquiça nian hodi ajuda mós Pelikan Paradise ba Comoro bele aumenta enerjia. Projetu ne’e nia orsamentu mai hosi Governu ho totál millaun $3,5,” Samuel Marçal hateten hafoin halo lansamentu bá Projetu espansaun sub-estasaun liña eletrisidade iha Munisípiu Liquiça, foin lalais ne’e.
Bá futuru Governu sei estabelese tán sub-estasaun ida iha Comoro no mós munisípiu sira ho modelu dijitalizasaun, nune’e bele kontrola enerjia eletrisidade ho di’ak liután.
Iha fatin hanesan, Sekretáriu Estadu Eletrisidade, Be’e no Saneamentu, Santos Noronha hateten, projetu instalasaun transformadór foun ne’e importante hodi atende kliente sira no husu kompañia TBEA atu aselera projetu ho kualidade tuir espesifikasaun no durasaun tempu bazeia ba kontratu ne’ebé iha.
Kona-bá ne’e, The Minister of Public Works Enters, Liu Yang agradese no onra boot tebes hodi partisipa iha serimónia ohin loron nian, nune’e hakarak hato’o apresiasaun bá Ministériu Obras Publika no EDTL bá konfiansa tomak no apoiu mai kompañia TBEA.
Tuir nian, Primeiru Ministru (PM) Kay Rala Xanana Gusmão ho Prezidente Xina, Xi-Jinpin anunsia servisu bilaterál komprensivu, no realizasaun dahuluk ida ne’e hanesan projetu eletrisidade ne’ebé empreza Xina implementa.
TBEA hatene katak projetu ne’e mós todan maibé fiar katak ho responsabilidade ne’ebé boot tebes sei aselera projetu tuir kontratu durante fulan neen nia laran bele remata no entrega bá Governu Timor Leste.
Jornalista: Tome da Silva