PN Hakru’uk bá Desizaun Tribunál Ne’ebé Interpreta Lei Indultu Inkonstitusionál

Hatutan.com (21 Fevereiru 2024), Díli—Parlamentu Nasionál (PN) hakru’uk bá deklarasaun Tribunál Rekursu (TR) ne’ebé halo interpretasaun bá Lei Indultu no iha artigu balun konsidera inkonstitusionál.

Prezidente Komisaun A ne’ebé trata assuntu Lejizlasaun no Justisa, deputadu Patrocinio Fernandes.

Prezidente Komisaun A ne’ebé trata asuntu Lejizlasaun no Justisa, deputadu Patrocínio Fernandes husu mós bá ema hotu-hotu atu hakru’uk bá desizaun Tribunál nian ne’e.

Lee Mós: Artigu Sira Hosi Lei Indultu Ne’ebé Tribunál Rekursu Konsidera Inkonstitusionál

“Ha’u mós hetan ona akordaun kona-bá Lei ne’ebé fó kompeténsia atu deklara katak Lei ne’e konstituionál ka inkonstituisionál. Ne’e, Tribunál nian ne’ebé ezerse ona funsaun. Hotu-hotu hakru’uk bá desizaun ida-ne’e,” deputadu Patrocínio Fernandes hateten iha PN, Kuarta (21/02/24).

Deputadu bankada CNRT ne’e dehan, bankada Governu ne’ebé aprezenta Projetu Lei ne’e, ikus mai transforma sai nu’udár Lei, ho hanoin no prinsípiu ida katak, oinsá bele kumpre Konstituisaun Repúblika artigu 85 hodi labele limita fila-fali kompeténsia Prezidente Repúblika ne’ebé hatuur iha Konstituisaun RDTL kona-bá kompeténsia atu fó indultu ka halo konsesaun pena bá sidadaun hotu-hotu ne’ebé hetan kondenasaun hosi Estadu ka hetan kastigu ona hosi Estadu.

Parlamentu Nasionál ezerse ninia funsaun ida nu’udár lejisladór hodi halo lei no Tribunál Rekursu mak iha kompeténsia atu halo interpretasaun bá Lei ne’e.

“Tribunál mak iha kompeténsia atu halo interpretasaun katak Lei sira ne’e hakru’uk bá Konstituisaun ka la’e,” nia hateten.

Bainhira Tribunál dehan ona katak iha akordaun iha artigu tolu kompostu hosi artigu 6 no parte balun hosi artigu 7 hanesan alinea 1, 4, 5 no artigu 9 hosi Lei ida-ne’e maka Tribunál deklara katak inkonstitusionalidade, entaun, Patrocínio husu atu hotu-hotu hakru’uk bá deklarasaun akordaun Tribunál nian.

Jornalista Estajiária: Zita Menezesa