Investimentu bá Edukasaun Feto TL Importante

Hatutan.com, (08 Marsu 2024), Díli—Prezidente Repúblika (PR), José Ramos-Horta konsidera investimentu bá edukasaun feto importante tebes nu’udár xave bá progressu Timor-Leste (TL).

Prezidente Repúblika, José Ramos-Horta selebra loron internasionál feto, Sesta (08/03/2024). Foto: Média PR.

Prezidente Repúblika, José Ramos-Horta hato’o deklarasaun ne’e iha ámbitu komemorasaun loron internasionál feto ne’ebé monu iha loron 08 fulan-Marsu kada tinan.

Lee Mós: Ramos-Horta Preokupa ho Direitu Feto-Labarik Ne’ebé Kontinua La Hetan Atensaun Iha Mundu

“Timor-Leste presiza tebes atu investe iha feto sira-nia edukasaun, kuidadu saúde, oportunidade ekonómiku no papél lideransa hodi aselera progresu ba sosiedade tomak,” Hatutan.com sita deklarasaun Ramos-Horta iha komunikadu, Sesta (08/03/2024).

Ramos-Horta dehan, iha loron internasionál feto nian iha tinan 2024, Timor-Leste reforsa ninia kompromissu maka’as atu investe iha empoderamentu feto no labarik-feto sira iha seitór hotu-hotu.

Xefe Estadu hatutan, bainhira investe iha feto sira-nia edukasaun, kuidadu saúde, oportunidade ekonómiku no papél lideransa, TL aselera duni progresu ba sosiedade tomak.

Prezidente Repúblika konsidera feto ida-ne’ebé iha kbiit boot hasa’e dignidade família, nia komunidade no nasaun.

“Mai ita kontinua halakon barreira sira, dezafiu ba estereotipu jéneru no kria mundu ida-ne’ebé hanesan, iha ne’ebé feto ida-idak bele atinji nia potensialidade tomak sein impedimentu,” nia apela.

Ikus liu Xefe Estadu hato’o ksolok loron internasionál feto bá feto hotu-hotu ne’ebé iha Timor-Leste no iha mundu tomak, ne’ebé nia reziliénsia, determinasaun, no kontribuisaun forma futuru ida-ne’ebé di’ak liu ba ema hotu.

Jornalista: Vito Salvadór