Justisa & Krime
Kazu Beto, MP Alega Krime Rua Hasoru Arguido Na’in-8, no Na’in-2 bá Ona Prizaun Preventiva
Hatutan.com, (27 Marsu 2024), Díli-Tribunal Judisiál Primeira Instánsia Díli (TJPID), Kuarta (27/03/2024), hala’o Primeiru Interrogatóriu Judisiál hasoru arguido na’in-ualu (8) ho inisial JGL, ZM, EX, AG, LUX, FCG, JS, RC, tanba deskonfia nu’udár autór prinsipál bá kazu konfrontu iha área Betó Leste, Sábadu 24 fulan-Marsu 2024.
Lee Mós: Konfrontu iha Betó, Uma Ida Rahun no Ajente Polísia Ida Kanek Gráve
Tribunál Distritál Díli (TDD). Foto/Dok.Hatutan.com
Iha audiénsia primeiru interrogatóriu ne’e, Ministériu Públiku (MP) liuhosi Prokuradór Pedro Baptista, alega arguido sira ho krime Arma Branka no Obstrusaun Kontra Autoridade Públika iha Lei Kódigu Penál Timor-Leste.
Ho alegasaun ne’e, ikus mai Juizu Albertina Nunes, deside hodi aplika medida koasaun Prizaun Preventiva bá Arguido JGL no EX, Termu Identidade Rezidénsia (TIR) bá arguido LUX ho FCG, no na’in-haat seluk halo aprezentasaun periódika bá Polisia, semana ida dala-tolu.
Hafoin rona tiha desizaun ne’e, Polisia Nasionál Timor-Leste (PNTL) liuhosi ekipa investigasaun kriminál komandu Munisípiu Díli, transporta kedan arguido na’in-rua lori bá kumpre nia sentensa iha Sentru Prizionál Becora, Díli.
Audiénsia Julgamentu ne’e prezide hosi Juiza Albertina, Ministériu Públiku (MP), reprezenta hosi Prokuradór Pedro Baptista, Arguido hetan defeza hosi Defensór José Guterres.
Kazu konfrontu entre membru grupu arte-marsiál iha Beto Leste, Suku Madohi, Postu Administrativu Dom Aleixo, Munisípiu Díli, Sábadu kalan (23/03/2024), rezulta uma ida rahun no ajente polísia ida kanek gráve.
Jornalista: Rogério Pereira Cárceres