Hatutan.com, (15 Abril 2024), Díli—Xefe bankada CNRT, deputadu Duarte Nunes husu atu halo auditoria urjente bá Institutu Nasionál Seguransa Sosiál (INSS) ne’ebé durante ne’e laiha relatóriu hodi aprezenta bá Ministériu Finansas (MF).
“INSS iha duni problema tanba laiha relatóriu fundu iha seguransa sosiál ita la hatene. Ha’u hanoin importante atu ita halo auditoria,” Duarte Nunes hateten iha PN, Segunda (15/04/2024).
Lee Mós: Kontribuisaun Seguransa Sosiál, Kada Sidadaun iha Direitu bá Subsídiu Neen ho Pensaun Haat
Deputadu ne’e husu auditoria tanba kontribuisaun bá seguransa sosiál ne’e, osan ne’e mai hosi Estadu no osan povu nian mós iha, entaun presiza informasaun periódiku nune’e osan na’in sira bele hatene.
“Tanba ne’e, ha’u husu ho urjente atu halo auditoria hodi bele hatete loloos kona-bá asuntu ne’e,” nia husu.
Kona-bá ne’e, Ministra Finansas, Santina Viegas Cardoso hateten bainhira ko’alia kona-bá auditoria la signifika atu buka sala de’it maibé, halo auditoria atu buka hatene mekanizmu jestaun ne’ebé mak halo durante ne’e di’ak ka la’e.
“Auditoria ne’e atu halo melloramentu entermus ita nia transferénsia akuntabilidade efisiénsia, efikásia entermus orsamentu bá públiku,” nia haktuir iha plenária.
Nia informa katak, Ministériu Finansas husu atu identifika entidade sira nia ezekusaun kada trimestre aumezmu tempu fasilita atu bele intende malu entermus ezekusaun ne’e rasik.
Jornalista Estajiária: Zita Menezes
