Governu Tenke Konsidera Kompeténsia Xefe Estadu iha Kooperasaun Internasionál Kuadru Defeza

Hatutan.com, (16 Abríl 2024), Díli— Prezidente Repúblika (PR), José Ramos-Horta husu Governu tenke tau konsiderasaun bá buat balun kona-bá kompeténsia Xefe Estadu nian iha kooperasaun internasionál kuadru defeza.

Xefe Estadu, José Ramos-Horta hasoru-malu ho Ministru Defeza (MD) Contra Almirante Donaciano Costa Gomes “Pedro Klamar Fuik” iha Prezidénsia Repúblika, Bairru-Pité, tersa (16/04/2024).

Iha tersa (16/04/2024) Xefe Estadu konvida Ministru Defeza (MD) Contra Almirante Donaciano Costa Gomes “Pedro Klamar Fuik” hodi haree hamutuk asuntu ne’e liu hosi audiénsia iha Palásiu Prezidensiál Nicolau Lobato Bairru-Pité.

Lee Mós: Dezenvolvimentu F-FDTL Tenke Tuir Konseitu Estratéjiku Defeza no Seguransa Nasionál

“Xefe Estadu haree katak, Governu presiza tau iha konsiderasaun buat balun kona-bá kompeténsia Xefe Estadu nian iha kooperasaun internasionál kuadru defeza, nune’e mós kompeténsia Governu nian depois bele hetan sinkronizasaun di’ak ida bainhira ita halo kooperasaun ho rai se de’it ne’ebé iha kooperasaun ho ita ka bainhira ita atu bele mantein kooperasaun di’ak ho rai ne’ebé ita halo kooperasaun,” Pedro Klamar Fuik hateten.

Durante enkontru Prezidente Repúblika fó hanoin ba Governu atu presiza tebes hodi haree kompeténsia sira ne’e ho diak no haree mós atividade hotu-hotu ne’ebé iha kuadru kooperasaun ne’e bele halo didi’ak entre órgaun soberania sira hotu.

Jornalista: Vito Salvadór