Prezidente Repúblika ho CCI-TL Diskute Dezafiu Investimentu iha TL

Hatutan.com, (16 Abríl 2024), Díli— Prezidente Repúblika (PR), José Ramos-Horta hamutuk ho Câmara Comercio Indústria Timor-Leste (CCI-TL) hala’o diskusaun kona-bá dezafiu investimentu iha Timor-Leste liuliu liga ho lejislasaun sira.

Prezidente Repúblika (PR), José Ramos-Horta hamutuk ho Câmara Comercio Indústria Timor-Leste (CCI-TL) hala’o diskusaun kona-bá dezafiu investimentu iha Timor-Leste liuliu liga ho lejislasaun sira, iha Palásiu Prezidensiál Nicolau Lobato Bairru-Pité, tersa (16/04/2024). Foto: Média PR.

Prezidente CCI-TL, Jorge Manuel de Araújo Serrano hateten, enkontru ida-ne’e realiza tanba pedidu hosi Prezidente Repúblika ne’ebé hakarak atu rona hanoin hosi seitór privadu no emprezáriu sira kona-bá partisipasaun iha dezenvolvimentu nasionál, dezafiu saida mak emprezáriu sira hasoru, problema, progressu iha dezenvolvimentu ekonomia no ligasaun seitór privadu sira nian ho Organizasaun Mundiál Komérsiu (OMK), Association of Southeast Asian Nation (ASEAN) no Comunidade dos Paises de Lingua Portuguesa (CPLP).

Lee Mós: CCI-TL Tenke Konsentra Nia Papél Promove Interese Setór Privadu

“Ami ko’alia kona-bá dezafiu bá investimentu iha Timor-Leste liga ho lejislasaun sira, iha problema balun ne’ebé ohin Xefe Estadu ko’alia di’ak loos kona-bá polítika protesaun no mós barreira sira ne’ebé implika investór estranjeiru no mós nasionál atu bele halo investimentu,” Jorge Serrano hateten hafoin  sorumutu iha Palásiu Prezidensiál Nicolau Lobato Bairru-Pité, tersa (16/04/2024).

Nia dehan, Prezidente Repúblika hatene di’ak kona-bá problema lejislasaun sira ne’e, tanba ne’e ohin iha diskusaun ne’e troka ideia no iha informasaun natón atu bele ajuda CCI-TL hodi komunika ho autoridade kompetente sira hodi solusiona problema lejislasaun ne’ebé sai dezafiu bá investór sira iha Timor Leste.

Nia informa katak, enkontru ne’e furak tebtebes, Xefe Estadu rona CCI-TL nia hanoin no parte CCI-TL mós rona Xefe Estadu nia preokupasaun sira, diskusaun sira la sai hosi kontestu Timor Leste nian ne’ebé hotu-hotu preokupa tanba hakarak hadi’a rai ida-ne’e, atu kontribui ba fó empregu, motiva investimentu no hasa’e produsaun iha rai laran, nune’e bele iha sustentabilidade ekonomia.

Jornalista: Vito Salvadór