Governu Seidauk Aprezenta Lista Kandidatu Komisáriu CAC

Hatutan.com, (16 Maiu 2024), Díli– Parlamentu Nasionál liuhusi Sekretária Meza Parlamentár, Deputada Virgina Ana Belo hateten, Governu seidauk submete lista kandidatu komisáriu foun bá Comissão Anti-Corrupção (CAC) hodi hakat bá eleisaun. 

Lee Mós: Prezidente Repúblika Promulga Ona Alterasaun Lei CAC

Sekretária Meza PN, Deputada Virgina Ana Belo. Foto/Zita Menezes

“Ami espera, ohin, atu pronúnsia maibé Vise-Ministru asuntu Parlamentár Adérito Hugo da Costa la marka prezensa, ne’ebé seidauk  no ami tenki hein,” Deputada Virgina Ana Belo haktuir bá jornalista sira  iha PN, Kinta  (16/05/2024).

Parlamentu Nasionál sei kontinua hein lista kandidatu komisáriu foun CAC  nian husi Governu atu bele ajenda bá prosesu eleisaun.

Iha loron 22 fulan-Abríl 2024, Parlamentu Nasionál aprova proposta Lei, 2ª alterasaun bá Lei n°8/2009, 15 de jullu kona-bá Komisaun Anti-Korrupsaun (CAC siglá portugés) iha finál globál hodi haruka bá Prezidente Repúblika no ikus-mai hetan promulgasaun.

Iha loron 13 fulan-Maiu 2024, Prezidente Repúblika (PR), José Ramos-Horta, promulga ona proposta Lei, 2ª alterasaun bá Lei n°8/2009, 15 de Jullu kona-bá Komisaun Anti-Korrupsaun (CAC siglá portugés), atu fasilita Parlamentu Nasionál (PN) halo eleisaun bá Komissáriu foun.

Jornalista Estajiária : Zita Menezes