Prezidente Repúblika Simu Karta Kredensiál Hosi Embaixadór Extraordináriu-Plenipotensiáriu Repúblika Ángola

Hatutan.com, (23 Maiu 2024), Díli—Prezidente Repúblika (PR), José Ramos-Horta, Kinta (23/05/2024) ne’e simu karta kredensiál husi Embaixadór foun Extraordinário no Plenipotensiáriu Repúblika Angola José Andrade de Lemos, iha Palásiu Prezidensiál.

Prezidente Repúblika (PR), José Ramos-Horta, Kinta (23/05/2024) ne’e simu karta kredensiál hosi Embaixadór foun Extraordináriu no Plenipotensiáriu Repúblika Ángola, José Andrade de Lemos, iha Palásiu Prezidensiál. Foto: Média PR.

Prezidente Repúblika José Ramos-Horta simu kredensiál diplomátiku husi Embaixadór José Andrade de Lemos nu’udar Embaixadór foun Estraordináriu no Plenipotensiáriu Repúblika Angola nian ba Repúblika Demokratika Timor-Leste (RDTL).

Lee Mós: Timor-Leste ho Ángola Haree Oportunidade Investimentu iha ASEAN

Embaixadór José Andrade de Lemos nu’udar diplomata Angolanu ida ne’ebé susesu ho karreira ne’ebé hala’o durante tinan tolu-nolu (30) nia laran.  Nia servisu nu’udar konselleiru iha Gabinete Sekretáriu Estadu Negósius Estranjeiru (SENE) no Embaixadór Angola nian ba Emiradus Arabes Unidus, Arabia Saudita, Kuwait, Qatar no Bahrain.

“Timor-Leste no Angola iha ligasaun istórika ida-ne’ebé kle’an iha sira-nia luta ba libertasaun nasionál. Nasaun rua ne’e iha kompromisu atu hametin sira-nia relasaun bilaterál amigável iha ámbitu Komunidade Pais Lian Portugés (CPLP- sigla português). Timor-Leste rekoñese potensialidade Angola nian iha setór mina-rai no gás, hodi hatudu interese iha parseria diplomátika, ho Angola sei sai hanesan nasaun primeiru husi nasaun Afrika ne’ebé ko’alia lian portugés hodi loke embaixada iha Timor-Leste, hodi kontinua relasaun diplomátika,” Hatutan.com sita komunikadu.

Kooperasaun entre nasaun rua ne’e mós haluan ba asuntu rejionál sira, inklui disputa marítima iha Tasi Xina Súl, iha ne’ebé Timor-Leste apoiu rezolusaun pasífika liuhosi diplomasia. Nasaun rua apoiu malu iha esforsu multilaterál sira inklui esforsu Timor-Leste nia integrasaun ba ASEAN no pozisaun Angola nian iha Sahara Osidentál.

Prezidente Repúblika José Ramos-Horta hato’o nia konfiansa katak Embaixadór José Andrade de Lemos sei hasa’e no hametin ligasaun amizade no kooperasaun entre Timor-Leste no Angola.

Jornalista: Vito Salvadór