Bee-Moos no Menus Profesór Sai Preokupasaun Komunidade Fadabloco

Hatutan.com, (24 Maiu 2024), Aileu- Kondisaun  infraestrutura báziku, hanesan estrada, bee-moos ho menus profesór sai hanesan preokupasaun  esensiál komunidade Suku Fadabloco, Postu Administrativu Remexio, Munisípiu Aileu.

Lee Mós: Xefe Estadu Apoiu Nesesidade Báziku bá Família Defisiénsia no Vulneravel iha Fadabloco ho Açu-Mau

PR José Ramos-Horta vizita komunidade Suku Fadabloco, Postu Administrativu Remexio, Munisípiu Aileu, Sesta (24/05/2024). Foto/Vito Salvadór

Liuhusi programa diálogu komunitáriu ho Prezidente Repúblika, José Ramos-Horta ho komunidade Suku  Fadabloco, Sesta (24/05/2024), iha Suku Fadabloco, xefe suku Lito da Costa, husu bá Prezidente Repúblika atu transmite hela bá Governu ka ministériu relevante atu tau-matan bá kondisaun infrastrutura  báziku ne’ebé nia komunidade enfrenta iha tinan barak nia laran.

“Atu dehan de’it katak Fadabloco la’ós problema ida de’it, maibé problema barak, no difikuldade hotu ne’ebé iha ami mesak sente la bele. Ho Prezidente Repúblika nia prezensa ami hameno hela katak ami nia problema mak infraestrutura bázika liu-liu estrada ladún di’ak, iha edukasaun menus manorin nian, falta bee-moos no problema sira seluk ne’ebé afeta mós bá komunidade sira nia moris-di’ak,” Xefe Suku Fadabloco, Lito da Costa  hateten.

Autoridade lokál ne’e hatutan ho difikuldade no problema sira ne’ebé komunidade hasoru obriga tenke ezije bá ukun-na’in sira atu haree no konsidera hodi tau-matan ba komunidade sira.

Xefe Suku mós rekoñese katak problema hirak ne’e la’ós kompeténsia Xefe Estadu nian, maibé hein ho esperansa katak Xefe Estadu sei hato’o bá Governu atu bele hola medida ruma hodi responde bá preokupasaun ne’ebé komunidade sira enfrenta.

Reprezentante Juventude Fadabloco, Simão Andrade, kontente ho Prezidente Repúblika José Ramos-Horta nia prezensa iha Suku Fadabloco. Maibé nia preokupa abitante sira Suku Fadabloco enfrenta problema menus profesór, kondisaun no fasilidade saúde inklui problema sosial sira seluk.

Cristina Carceres Salsinha nu’udár estudante kontente ho Prezidente Repúblika nia prezensa iha Suku Fadabloco hodi haree besik kondisaun moris komunidade nian.

“Ami nia eskola ne’ebé harii ho pakote referendum agora kondisaun grave tebes tamba ne’e aproveita Prezidente Repúblika nia prezensa ami husu tulun atu hadi’a ami nia eskola,” Cristina Carceres Salsinha hateten.

Iha fatin hanesan, Prezidente Repúblika José Ramos-Horta hateten  rona ona problema no pedidu sira husi komunidade Fadabloco, tanba ne’e sei apoiu tuir saida mak Prezidénsia Repúblika bele tanba problema sira liga ho saúde, edukasaun no infraestrutura ne’e  Governu nia kompeténsia.

Xefe Estadu subliña atu loke eskola Sekundáriu karik ne’e tenke liu husi Ministériu Edukasaun tuir planu tanba labele loke eskola arbiru de’it. Kona-ba ba bee-moos, estrada no infraestrutura bázika sira seluk ne’e ministériu sira-nia kompeténsia, maibé Prezidénsia Repúblika sei halo buat ne’ebé bele hanesan apoiu meza no kadeira bá eskola, halo sintina públiku, dada bee-moos ruma bá komunidade, no sira seluk tan tuir kbiit Prezidénsia Repúblika nian.

Suku Fadabloco iha aldeia haat mak hanesan Lequiça, Lilitei, Raifatu, Rileu, ho totál populasaun hamutuk 2726.

Jornalista : Vito Salvadór