Horta ho Winston Piters Deskute Unidade ASEAN no Kestaun Myanmar

Hatutan.com (12 Juñu 2024), Díli- Prezidente Repúblika (PR), José Ramos-Horta ho Vise-Primeiru-Ministru Nova Zelándia Winston Piters diskute unidade nasaun sira iha Association of Southeast Asian Nations (ASEAN) no kestaun  Myanmar.

Lee Mós: Governu TL-Nova Zelándia Diskute Dezenvolvimentu Seitór Turizmu ho Kapasitasaun Rekursu Umanu

Prezidente Repúblika (PR), José Ramos-Horta ho Vise-Primeiru-Ministru Nova Zelándia Winston Piters. Foto/Elio dos Santos da Costa

“Nova Zelándia belun boot Timor-Leste nian no iha kooperasaun metin iha tinan hirak nia laran, hahú husi 1999 too mai ohin loron,” Prezidente Repúblika José Ramos-Horta hateten ba jornalista sira iha Palásiu Prezidensiál, Kuarta (12/06/2024).

Vise-Primeiru-Ministru Nova Zelándia Winston Piters iha nia entrevista hateten ne’e onra boot tebes atu hetan  benvindu husi Prezidente Repúblika Timor-Leste José Ramos Horta, iha reuniaun ida ne’ebé produtivu no di’ak tebes.

Nova Zelándia hanoin hetan didi’ak,  luta ba independénsia no parte kritiku ne’ebé maka hala’o hodi asegura apoiu internasionál husi líder nasionál ida hanesan Prezidente José Ramos-Horta.

Nia dehan hakarak rekoñese katak iha tinan ida-ne’e marka tinan XXV, INTERFET nian ne’ebé forsa defeza Nova Zelándia nian haruka kontribuisaun signifikante, kuaze militár rihun lima resin ne’ebé maka servisu parte ida husi INTERFET ninian.

“Ami mós ko’alia kona-ba unidade ASEAN ninian no mós isu Myanmar nian no hein katak sei iha solusaun. Ho luta sira ne’ebé Prezidente Ramos-Horta halo haree ba furak tebe-tebes,” Vise-Primeiru-Ministru Nova Zelándia Winston Piters haktuir.

Nia hatutan durante sorumutuk, iha diskusaun ne’ebé di’ak ho Prezidente Repúblika José Ramos-Horta. Timor-Leste no Nova Zelándia hanesan estadu ne’ebé ki’ik iha mundu ne’ebé mais komplexu  ho  papél global sira ba asegura pas no unidade.

Nia subliña Nova Zelándia mós konkorda kona-bá reforma konsellu seguransa Nasoins Unidas nian ne’ebé importante tebetebes.

Jornalista: Vito Salvadór