Musulmanu Timor-Leste Selebra Idul Adha 1445 H

Hatutan.com, ( 17 Juñu 2024), Díli–Komunidade musulmanu  Timor Leste, Segunda (17/06/2024),  halibur malu hodi reza ka sholat iha Meskita An-nur, Kampu Alor, Díli, hodi selebra loron Idul Adha ka Eid ul-Adha  1445 Hijriah.

Lee Mós: Idul Adha, Koko Ema Nia Pasiénsia

Komunidade Musulmanu Timor Leste selebra loron boot Idul Adha 1445 Hijriah iha Meskita An’nur, Díli, Segunda (17/06/2024). Foto/Elio dos Santos

Idul Adha ka Eid ul-Adha nu’udár loron boot ida bá Musulmanu hotu iha mundu hafoin selebra festa boot Idul Fitri. Tuir kalendáriu Hijriah ka loron 70 hafoin selebra Indul Fitri Musulmanu sira selebra loron boot tuir mak Idul Adha ne’ebé sempre komemora iha loron 10 Dzulhijjah.

Loron boot Indul Adha nu’udár loron ikus adorasaun Hajj (haji) bainhira musulmanu tokon husi nasaun oioin iha mundu halibur iha Mekkah atu hala’o adorasaun oioin ne’ebé sai nu’udár pilar da-lima Islam nian.

Xefe Fundasaun An-nur Anwar da Costa, hateten loron Idul Adha nu’udár loron sakrifisiu hodi oho animal sira hodi fahe bá ema kbiit-laek sira.

Iha biban ne’e Vise-Primeiru Ministru no Ministru  Koordenador bá asuntu Sosiál, Mariano Assnami Sabino lori Governu Timor-Leste nia naran marka mós prezensa iha selebrasaun festa  ne’e hodi hato’o  solidariedade  bá malu iha sentidu toleránsia iha relijiaun.

“Ohin mós sira halo sakrifisiu hanesan oho  karau 17 no bibi 13 ne’ebé sei oferese bá oan kiak sira, ferik-katuas sira  iha loron boot ne’e nu’udár sentidu kontente hamutuk ho sira ne’ebé susar hela,” Mariano Sabino hateten.

Nia dehan  futuru governu mós sei haree hodi oferese doasaun bá iha selebrasaun Idhul Adha. Tanba durante ne’e Governu fó apoiu bá relijiaun hotu-hotu iha Timor Leste, papel estadu hodi garantia, i husu ba relijiaun hotu atu formasaun karakter bá povu ida ne’ebê badinas, ba oan sira ne’ebé esperansa, iha hanoin di’ak, hanoin saudavel, hahalok saudavel, atu bele kontribui bá estadu ida ne’ebe saudavel.

Vise-PM Mariano Assanami Sabino festa hamutuk ho komunidade Musulmanu iha loron boot Idul Adha 1445 Hijriah iha Meskita An-nur, Díli. Foto/Elio dos Santos da Costa

Nia husu ba lider Musulmanu iha Timor-Leste atu hadia karater joven sira, atu hamosu sivilizasaun ida ne’ebé hatene respeita malu, hadomi malu no solidariu.

Sekretariu Superiór An-nur, Boaventura da Silva  hato’o agradese ba Vise-Primeiru-Ministru  ne’ebe reprezenta ona Governu no Estadu hodi solidariza no manifesta ona komunidade musulmanu iha Timor-Leste.

“Komunidade Musulmanu prontu koopera ho Estadu, Governu no povu tomak hodi servisu hamutuk bá nasaun,” nia hateten hodi dehan tan, tanba Timor-Leste nu’udár nasaun uniku nia karakteristiku ne’ebé propriu tanba ne’e persiza iha diálogu ne’ebé di’ak, nune’e bele  bele rezolve problema hotu.

Jornalista: Leopoldina de Carvalho