Membru PCIC ho Inisiál OdCA Hetan Suspensaun Tinan Ida no Lakon Regalia Sira

Hatutan.com, (24 Juñu 2024), Díli-Policia Ciêntífica e de Investigação Criminal (PCIC) liuhosi diretór nasionál  Vicente Fernandes e Brito, informa katak, nia membru ho inisial OdCA ne’ebé molok ne’e hetan suspensaun tanba husu osan ba oan-mane hosi fujitivu Arnolfo Arnie Teves Junior (Jr), labele hala’o funsaun iha tinan ida tomak, inklui lakon mós nia direitu no regalia sira hotu.

Lee Mós: Ministru Sergio Hornai Halo Hela Avaliasaun bá Komportamentu Diretór Nasionál PCIC

Edifísiu PCIC iha Caicoli, Díli. Foto/Lazaro Quefi Pereira

“Informasaun ne’e, kona-bá membru PCIC ne’ebé ita-boot sira mensiona ne’e, sansaun dixiplinár ne’e iha tiha ona. Inatividade. Signifika, tinan ida nia la servisu. Nia hala’o nia vida hanesan vida sivíl,” Diretór Nasionál PCIC Vicente Fernandes e Brito, hatete bá jornalista sira, hafoin partisipa iha serimónia abertura Ezersísiu CARAT 2024 nian iha Estádiu Munisipál Dili, Segunda (24/06/2024).

Superior PCIC ne’e dehan, prosesu ne’ebé halo hasoru ninia membru ho inisiál  OdCA ne’e la’ós prosesu ida ansiózu. Ida-ne’e tenke liuhosi prosesu normal, sira labele haree de’it bá nia konteúdu, maibé refere bá nia prosesu ka prosesuál.

“Ne’ebé, to’o ikus, ita konklui katak, iha duni faktu ne’ebé mak komprova, prontu, ita haree grau ilísitude, ita fó nia, purtantu pena inatividade. Signifika katak, nia labele simu saláriu. Mais, ha’u sei konfirma took bá kestaun ida-ne’e, purke, inatividade, signifika nia la servisu ka lae. Purtantu, nia lakon direitu, regalis ein-relasaun ho nia funsaun,” Vicente Fernandes e Brito informa.

“Prontu, ita sei haree took, tanba PCIC nia servisu barak ka lae. Iha parte investigasaun, interpol, buat sira ne’e ne’ebé, klaru, ha’u atu dehan katak, la simu saláriu. Bá kazu ida ne’e, ne’ebé, ida ne’e mak ha’u bele informa,” nia tenik.

Bainhira husu kona-bá prova saida mak PCIC bele justifika katak, membru ne’e la simu saláriu ka lakon nia direitu no regalia sira to’o tinan ida, diretór nasionál PCIC ne’e dehan, nia presiza konfirma fila-fali.

“Tanba ita-boot nia pergunta ne’e mak ha’u la-hatene ka lae. Ha’u presiza konfirma. Purke nia rasionalidade, signifika kuandu bá prosesu administrativu liu-liu prosesu dixiplinár, kuandu termina ona, entaun ema ne’e labele halo atividade,” nia hateten.

Sansaun ka pena inatividade ne’ebé PCIC aplika daudauk, ne’e la’oó de’it bá membru PCIC ho inisiál  OdCA ne’ebé komete kazu ne’e, maibé, aplika bá funsionáriu sé de’it bainhira nia halo krime korrupsaun.

Pesoál PCIC ho inisiál OdCA  nia kazu sira  tuir dokumentu iha relatóriu PCIC nian ne’ebé Hatutan.com asesu mak hanesan; 

• Deskonfia komete krime ne’ebé rejistu iha Ministériu Públiku no Comissão Anti-Corrupção (CAC) ne’ebé parte sira konstitui ona hanesan arguido ba krime burla agravado tamba deskonfia simu vítima sira-nia osan (montante hale’u $700.00) inklui abuzu podér tanba utiliza edifísiu PCIC hodi rezolve problema partikulár balun.
• Deskonfia OdCA envolve mós kazu utiliza arma hodi ameasa ema seluk iha PCIC tanba problema feto mo vítima hato’o keixa  bá Diretor Nasionál PCIC, Vicente Fernandes e Brito;
• Deskunfia OdCa uza poder hodi fasilita fó treinu bá Diretór Nasionál PCIC Vicente Fernandes e Brito nia oan- mane utiliza arma PCIC nian no pratika tiru iha carrega de tiro PCIC nian iha área Kaitehu, Munisípiu Liquiça;
• Deskunfia OdCA iha fulan-Marcsu 2024 sai mós hanesan testemuña bá kazu korrupsaun ne’ebé envolve membru PCIC iha prosesu konkursu limpeza iha PCIC ne’ebé akontese iha tinan 2021;
• Deskunfia OdCA komete kazu abuzu poder, extorsão e corrupção passiva ba kazu fujitivu Arnolfo A. Teves, Jr. ne’ebe envolve atividade terrorismu iha Filipina. Iha ne’ebe Arnolfo A. Teves, Jr. kumpre hela Prisão Preventiva iha Estabelesimentu Prizionál Becora, Díli.

Jornalista: Rogério Pereira Cárceres