IGJ Legaliza Corais Timor bá Atividade Futu-Manu

Hatutan.com, (27 Juñu 2024), Díli- Inspesaun Jerál bá Jogu  (IGJ, sigla portugés) legaliza no sertifika Empreza Corais Timor Unipessoal, Lda hodi halo atividade futu-manu manu no kontribui taxa bá Estadu.

Lee Mós: Operadór Bola Guling Kumpre Rezolusaun Governu Suspende Atividade Provizóriu

Arena Kokorekok bá futu-manu nian lokaliza iha Aldeia Auhun, Suku Becora, Postu Administrativu Kristu Rei, Munisípiu Dili. Foto/Tome da Silva

Fatin futu-manu ne’e ho naran Arena Kokorekok lokaliza iha Aldeia Auhun, Suku Becora, Postu Administrativu Kristu Rei, Munisípiu Dili.

Iha Kinta (27/06/2024), ekipa IGJ halo fiskalizasaun bá terrenu ka fatin futu-manu empreza Corais Timor Unipessoal, Lda ne’ebé hetan lisensa husi SERVE,I.P  no haree katak posivel iha Sábadu, 29 fulan-Juñu 2024, bele ona halo abertura bá atividade futu-manu iha fatin refere.

“Durante ita hare katak iha Díli laran fatin bá futu-manu ne’e barak tebes iha bairru sira ne’ebe mak deskontrolu. Nune’e, IGJ nia ekipa la’o ona tama-sai bairru-bairru hodi identifika fatin futu-manu  sira ne’ebe mak iha Díli laran tomak depois identifikasaun katak empreza ida naran Corais Timor Unipesoal, Lda mak hetan lisensa husi IGJ,” Inspetór Jerál Jogu, Domingos da Costa Guterres informa.

IGJ identifika katak husi fulan-Novembru 2023 to’o agora mosu fatin futu-manu nian barak tebes nune’e IGJ tenke regulariza didi’ak atividade futu-manu sira iha Díli atu oriente ema sira mai futu-manu deit iha arena Kokorekok.

“Ami se la autoriza futu-manu sira ne’e iha bairru-bairru tanba ne’e IGJ sei servisu hamutuk ho PNTL no instituisaun relevante hodi bele iha kontrolu másimu atu nune’e organiza fatin futu-manu no kontribui taxa bá Estadu,” Domingos da Costa Guterres hateten.

Iha fatin hanesan Empreza na’in Corporais Timor, Natalino Faria  hateten iha tempu liu ba kampaña rasik husu IGJ atu mai haree fatin ne’ebe mak sira prepara tanba ne’e mak ohin sira hakat mai haree kondisaun ne’ebe mak fatin futu-manu ne’e iha.

Arena futu-manu iha Becora, Díli. Foto/Tome da Silva

“Espera ho kondisaun ne’ebe mak ami prepara bele atrai partisipante hosi futu-manu na’in sira mai utiliza ami nia fatin ne’e,” nia hateten.

Corporais Timor  prepara ona billete no fa’an ona kada ema $10.00 hodi asesu tama to’o laran, maibé hirak ne’ebé asiste husi li’ur ne’e livre.

Volume ba taru ne’e normálmente depende sira atu taru hira, maibé kuandu tama ona ba laran sei  kobra $100.00 atu mana ka lakon

IGJ identifika fatin futu-manu ilegál sira iha Dili laran hamutuk 12, mak hanesan iha Manleuna (eskola CANOSA nia sorin), Golgota, Maloa, Kulu-hun no seluk tan.

Jornalista Estajiáriu: Lazaro Pereira Quefi