Hatutan.com, (16 Jullu 2024), Díli—Prezidente Repúblika (PR), José Ramos-Horta felisita no hato’o parabéns bá Primeiru-Ministru eleitu Reinu Unidu, Keir Starmer.
Keir Starmer eleitu bá Primeiru-Ministru Reinu Unidu liu hosi eleisaun demokrátiku ne’ebé hala’o iha loron 04 fulan-jullu tinan 2024.
Lee Mós: Reinu Unidu Sei Deporta Timoroan 500
Prezidente Repúblika José Ramos-Horta mós hodi povu Timor-Leste nia naran, hato’o sinseru parabens bá vitória istórika Partidu Traballista nian iha lideransa Keir Starmer nian.
“Ida ne’e marka era foun transformasaun nian, nakonu ho esperansa no optimizmu bá Reinu Unidu,” Hatutan.com sita deklarasaun Ramos-Horta iha komunikadu, tersa (16/07/2024).
Prezidente Repúblika hato’o espetativa kolaborasaun pozitivu no konstrutivu ho Governu ne’ebé foin eleitu, ho objetivu atu hakle’an relasaun entre Timor-Leste no Reinu Unidu no hametin parseria foun iha área hotu-hotu, hodi promove kreximentu mútua no prosperiedade.
Importánsia hosi abertura ne’ebé hein kleur ona hosi Embaixada Reinu Unidu nian iha Díli, Timor-Leste, hanesan pasu signifikativu ida hodi reforsa kooperasaun diplomátiku no ekonómiku entre nasaun rua.
Asaun ida-ne’e sei permite atu maximiza oportunidade sira ne’ebé mosu hosi Timor-Leste nia adezaun foin lalais ne’e ba Organizasaun Mundiál Komérsiu (OMK) no adezaun eminente bá Asosiasaun Nasaun Sudeste Aziátiku (ASEAN) iha tinan 2025.
Rekoñese prezensa signifikativu hosi diáspora Timoroan sira iha Reinu Unidu, ne’ebé nia remesa sira reprezenta fonte rendimentu boot daruak ba Timor-Leste, hafoin reseita sira hosi petróleu no gás, no hatudu agradesimentu ba ospitalidade jeneroza hosi Reinu Unidu no nia ema sira.
Ramos-Horta reafirma vontade atu kolabora besik ho Primeiru-Ministru Keir Starmer no nia Governu hodi kontinua promove valór sira ne’ebé fahe-malu kona-ba liberdade, demokrasia no Estadu direitu iha rejiaun no mundu.
Jornalista: Vito Salvadór
