Autoridade Detein Timoroan Ida ho Nasionalidade Portugés iha Batugadé

Hatutan.com, (21 Outubru 2024), Batugadé—Autoridade Polísia Timor-Leste liuhusi Servisu Migrasaun ho Departamentu Investigasaun Kriminál Nasionál (DIKN) detein joven timoroan ida ho nasionalidade portugés bainhira atu hakur fronteira terrestre Batugadé  liubá Indonézia, Sábadu (19/10/2024).   

Timoroan ida ho inisiál AX ho nasionalidade Portugés ne’ebé autoridade sira detein iha postu integradu fronteira Batugadé, Sábadu (19/10/2024).

Informasaun ne’ebé Hatutan.com rekolla husi fonte prinsipál autoridade polísia sekreta sira iha lokál detensaun Postu Servisu Migrasaun Fronteira Terrestre Batugadé, Postu Administrativu Balibo, Munisípiu Bobonaro, haktuir katak detensaun ne’e bazeia bá Mandadu bá Buska iha Domisíliu no Apreensaun  ka Prende Sasán husi Tribunál Judisiál Primeira Instánsia Baucau ho Númeru Úniku Kriminál (NUC $(ic.NUCNo).

Tuir Mandadu Buska iha Domisíliu no Prende Sasán ne’ebé asina husi Juiz Direitu iha loron 18 fulan-Outubru 2024, fó prazu loron 20  atu halo Buska iha Domisiliu ho posibilidade ba Prende sasán ne’ebé mak bele iha ligasaun ho faktu hirak-ne’ebé investiga ona, tuir dispozisaun iha artigu 37 númeru  02, husi KRTL, iha art. 226, númeru  01, al. C), art. 168, númeru 01- no art. 170, hothotu husi Kkódigu Prosesu Penál (KPP) bá suspeitu ho inisiál AX nia hela-fatin iha Aldeia Aebere, Suku Luro, Postu Administrativu  Luro, Munisípiu Lautem.

Ordem bá halo buska ne’e konsede iha autu inkéritu nian NUC $(ic.NUCNo), hosi-ne’ebé investiga daudaun hela suspeitu ho inisiál AX kona-bá autoria krime Violénsia Doméstika (VD) ho Ofensa Integridade Fizika Simples, Prosesu Penál (P.P). husi art. 35/145 Kodigu Penál nian.

Daudaun ne’e parte Servisu Migrasaun iha Postu Integradu Fronteira Batugadé entrega ona suspeitu ho inisiál AX ne’e bá Departamentu Investigasaun Kriminál Nasionál hodi transporta mai Díli no submete bá prosesu sira tuir mai iha Tribunál Primeira Instánsia Baucau nian.

Jornalista: Rogério Pereira Cárceres