Governu Indika BTK Hadi’a Trotoár Naksobu iha Área Bebora

Hatutan.com, (06 Novembru 2024), Díli—Ministériu Obras Públika (MOP)  kontakta ka indika  kompañia BTK Unipessoal, Lda, hodi hadi’a trotoár iha área Bebora, Díli, besik ponte ne’ebé liga Palásiu Prezidensiál ho kampu multi-funsaun Bebora.

Lee Mós: Projetu Adjudikasaun Direta Estrada Kristu Rei ba Dolok-Oan La Tau Valor Orsamentu iha Kuadru Informasaun

Kompañia BTK hahú hadi’a trotoár iha área Bebora, Díli, Kuarta (06/11/2024). Foto/Tome da Silva

Ministru Obras Públika, Samuel Marcál, hateten Governu hola medida kontakta BTK ajuda hadi’a lalais tanba espasu trotoár refere fó ameasa bá transporte públiku ho ema la’o ain sira.

Tuir levantamentu téknika hosi MOP katak trotoár sira ne’e naksobu, inklui moru protesaun hosi mota Maloa tuun to’o ponte entre Palásiu Prezidensiál nia rohan balu nakfera tanba rai-dodok ne’ebe halo rai mamar no rai halai.

Trotoár maka elementu ida hosi infraestrutura urbana ne’ebé dezeña espesifikamente hanesan dalan bá ema la’o ain iha estrada ka auto-estrada nia ninin. Trotoár sira normalmente lokaliza entre estrada nia ninin no edifísiu sira ka propriedade sira ne’ebé besik estrada.

“Tersa horseik, mak monu tanba rai iha kraik ne’e afinal iha bee ida mai husi Palásiu Prezidensiál nian ne’e mak la sai liu halo rai ne’e dodook mak depois sira normaliza ne’e rai ne’e mamar halo rai nia dada an uitoan mais ou menus sentímetru 20, agora sira hadia hela espera katak semana ida tan finaliza ona,” Ministru Obras públikas Samuel Marçal hateten hodi responde Hatutan.com iha Parlamentu Nasionál, Kuarta ( 06/11/2024)

Ministru Samuel Marçal, informa hafoin akontesimentu, nia parte husu ajuda bá kompañia BTK Unipessoal atu apoiu hadia lalais.  Tanba kompañia ne’e mak iha ekipamentu  boardpail  ida, seluk iha maibe sira nia material laiha, so BTK mak iha ne’ebé husu nia ajuda deit mas pois mak MOP haree took.

Jornalista: Leopoldina de Carvalho