Membru Governu Sei Selebra Proklamasaun Independénsia ho Povu iha Postu Administrativu Sira

Hatuan.com, (16 Novembru 2024), Díli-Primeiru-Ministru (PM), Kay Rala Xanana Gusmão, orienta ona nia membru governu sira na’in-40 resin atu selebra loron proklamasaun independénsia ba dala-49  hamutuk ho povu iha postu administrativu iha loron 28 fulan-Novembru ne’e.

Lee Mós: 28 Novembru, FRETILIN Determinadu Defende Ukun Rasik An ho Sakrifisiu Tomak

Reuniaun Konsellu Ministru. Foto/Dok.Tome da Silva.

“Reuniaun primeiru-ministru ho membru konsellu ministru sira, primeiru, kona-bá distribuisaun membru governu sira iha 28 Novembru bá postu administrativu sira atu komemora loron Proklamasaun Independénsia, 28 Novembru 1975 iha postu administrativu hotu, maske komemorasaun ba tinan ne’e sei foku Rejiaun Administrativu Oé-Cusse Ambeno (RAEOA),” Sekretáriu Estadu Komunikasaun Sosial (SEKOMS), Expedito Dais Ximenes, reprezenta governu, informa rezultadu reuniaun konsellu ministru, Sábadu (16/11/2024).

“Membru governu sira sei destaka hotu bá postu administrativu sira, tanba postu administrativu sira iha 60-resin no membru governu mós 40-resin de’it, nune’e, sei priénxe mós hosi diretór jerál ho diretór ezekutivu sira ne’ebé iha, hanesan mós tinan ida liubá,” Expedito hateten.

La’os ne’e de’it, iha reuniaun estraordináriu Konsellu Ministru nian bá loron, avalia mós kona-bá diskusaun orsamentu jerál estadu bá membru governu sira ne’ebé liu tiha ona, horseik, no sira ne’ebé atu tuir mai iha semana oin.

Jornalista: Rogério Pereira Cárceres