Raul Lemos-KD Apoiu Trofeu Bá Manan Na’in sira Timor Leste Music Awards 2024

Hatutan.com, (05 Dezembru 2024), Díli- CEO Empreza nasionál Atramor  Sucsesso ho Raya Media & Entertainment, Raul dos Reis Lemos no nia espoza Krisdayanti (KD) sai mós patrosinadór hodi oferese Prémiu ka Trofeu ba manan na’in sira iha Timor-Leste Music Awards (TILMA) 2024 ba kategoria hamutuk 12.

Lee Mós: Presiden Ramos-Horta dan Ratusan Tamu Undangan Hadiri ‘Gala Dinner’ Raya Event

Eventu Timor-Leste Music Awards (TILMA) 2024. Foto/Elio dos Santos da Costa

Kategoria no manan na’in ba Timor-Leste Music Awards (TILMA) 2024 mak hanesan

1. Kategoria due/Grupu favoritu manan husi Jange and Valenada,
2. Kategoria Famela/Feto favoritu 2015/2024 manan husi Jessy Lopes,
3. Kategoria male/Mane favoritu husi 1975 to’o 1994 manan husi Anito Matos,
4. Kategoria male/Mane Artis favoritu hahú husi 1995 to’o 2014 manan husi Jenik Travolta,
5. Kategoria male /Mane favoritu manan husi Crimson,
6. Kategoria favoritu Band Artis hahú husi 1994 to 2015 manan husi Anar Band,
7. Kategoria favoritu Band huhú husi 2015 to’o 2024 manan husi Cocoustic band,
8. Kategoria Album favoritu manan husi Crimsson,
9. Kategoria favoritu Song Writing manan husi Ganjo,
10. Kategoria favoritu New Artist manan husi bá Jange,
11. Kategoria favoritu song manan husi Crimsson,
12. Kategoria favoritu Video Múzika manan husi Quatro Cores.

Serimonia istóriku iha mundu múzika Timor-Leste nian ne’ebé hala’o iha salaun multiuzus, Bebora, Díli, Kinta kalan (05/12/2024), entrega mós ssertifikadu  Apresiasaun ba Artista lendáriu  sira na’in-10 ida ne’e la/os mai husi votu maibé hanesan Onra ba Artista Lendáriuu sira ne’ebé sei iha no mós balu ne’ebé  mate ona, mak hanesan; 

1. Sequito Gama (matebian)
2. Lahane Group
3. Alo Perreira (matebian) reprezenta husi Toni Perreira
4. Toto Lebre (matebian) reprezenta husi 5 de Oriente
5. Cico Maulohi (matebian) reprezenta husi oan Feto
6. Mario da Silva (matebian) reprezenta husi oan Feto
7. Agustinho Moniz
8. Abilio Araújo (matebian) reprezenta ka tiun husi  Nino Perreira
9. Filipe dos Santos Aranhado
10. Domingos Alves reprezenta husi Paul 5 de Oriente

Prezidente komisaun organizadora ba eventu TILMA 2024 no Vise-Prezidente ALMAMOR, Paulino Pacheco C. Magno, hato’o agradese ba patrosinadór sira hotu ne’ebé apoiu eventu TILMA 2024 ba dahuluk nian.

Ba Governu no mós individu no setór privadu nasionál no internasionál ne’ebé apoiu ba realizasaun eventu ne’e ALMAMOR agradese.

Nia afirma ALMAMOR hanesan organizasaun dahuluk hafoin Timor-Leste restaura nia independénsia tamba ne’e TILMA 2024 hanesan mehi ne’ebé ALMAMOR iha antes ona no tinan ida realiza ho apoiu husi patrosinadór oin-oin no mos governu.

“Maun Raul Lemos ho mana KD maske laiha ne’e, maibé sira nia espíritu hela ho Timor-Leste Music Awards 2024, sira hateten tinan oin Timor-Leste nia Music Awards tenke estandar ho Indonézia nian, Trofeu sira ne’ebé ohin simu mai husi maun Raul Lemos ho mana KD, sira hanesan família artista ne’ebé hakarak suporta ideia di’ak ne’ebé ita komesa,” Paulino Pacheco C. Magno hateten.

Prezidente ALMAMOR Felipus Nino Pereira hato’o nia diskursu iha Timor-Leste Music Awards (TILMA) 2024. Foto/Elio dos Santos da Costa

Prezidente ALMAMOR Felipus Nino Pereira iha nia liafuan agradesimentu hateten orgullu no haksolok ba hotu-hotu ne’ebé hamutuk iha ne’e, orgullu tamba hamutuk ho figura ida importante dezde iha tempu difisil too mai tempu dezenvolvimentu ida ne’e,  hodi hotu-hotu asiste hamutuk buat di’ak hotu ne’ebé mak halo ba nasaun ida ne’e.

Orgullu mós tamba iha momentu importante ida-ne’e foin mak ba-dala uluk ALMAMOR organiza Timor-Leste Music Award (TILMA), no espera katak tinan oin sei kontinua tamba sura mos apoi hotu husi patrocinador sira no mos husi governu liu husi MJDAC.

“Ho ita hotu nia kolaborasaun fiar metin katak eventu ida ne’e, ita hakarak fó apresiasaun boot ba obra múzika sira hotu, ne’ebé la kole, kalan no loron moris fó an tomak no depende ba múzika tamba ne’e eventu sira nune’e ita realiza atu fó onra no orgullu ba obra hotu ne’ebé artista sira prodús,” Filipus Nino Pereira hateten.

Nia hatutan komunidade artista ne’ebé hahú iha TILMA ne’e  fahe ba kategoria sira hahú husi dékada 1975 to’o mai 2024, ne’ebé fiar katak tinan ne’e sidauk bele halo buat hotu-hotu atu fo apresiasaun ba komunidade artista sira maibé ida ne’e mak pasu dahuluk atu ita kontinua hodi dignifika obra artistiku sira ne’e hotu no mos múzika Timor-Leste nian.

Primeiru-Ministru Kay Rala Xanana Gusmão hateten onra boot ba  bele partisipa no fó parabéns ba ALMAMOR ba komisaun organizadora no agradese ba hotu-hotu ne’ebé ajuda.

Timor-Leste hahú ukun an liu tiha tinan 22 ona, iha prosesu rua importante ida konstrusaun Estadu, no ida seluk mak konstrusaun nasaun. Iha konstrusaun estadu mak atu hamoris instituisaun estadu sira hotu hodi hadia no hari’i, portantu konstrusaun nasaun pertense ba ita hotu.

Chief Executive Officer (CEO) Atramor Sucsesso ho Raya Media & Entertainment, Raul dos Reis Lemos. Foto/Dok.Hatutan.com

“Mesmu hasoru difikuldade, imi bele prova, laos ba Governu maibé ba imi nia an rasik no ba kotuk katak Timoroan iha hakarak tau hamutuk hanoin hakarak halo buat ne’ebé di’ak,” Primeiru-Ministru Xanana Gusmão hateten.

Ohin hateten ona TILMA halibur imi artista sira ne’e hahu kedas husi 1975, los dunik, sente katak imi sente iha imi nia fuan laran, imi nia klamar iha buat ruma ne’ebé mak falta, tamba sai artista ninia hakarak ne’e atu hasai, fo sai talentu saida mak iha, ne’ebé imi sira ne’e tau hamutuk, fiar katak lakleur Timoroan mos bele halo konsertu hanesan foin daudauk halo iha ne’e no bele ba halo mos iha liur ka estranjeiru.

Hein katak tinan oin mai sei susesu liután, ne’e dunik husu ba imi hotu esforsu an liután hodi lori Timor ba mundu, liu husi múzika.

Tuir observasaun Hatutan.com nian bainhira anúnsiu ka lee sai naran manan na’in ba kada kategoria iha TILMA 2024, Master of Ceremony sempre aprezenta ba manan na’in sira katak trofeu ne’ebé sira simu hetan apoiu direita husi na’in ba Empreza nasionál Atramor no Raya Media & Entertainment, Raul Lemos ho nia espoza diva Pop Indonézia Krisdayanti (KD).

Hoi sorin seluk, CEO Atramor no Raya Media & Entertainment, Raul Lemos ne’ebé Hatutan.com konfirma via telefónika hateten nia parte orgullu ho inisiativa sira hosi artista Timoroan sira hotu ba eventu importante no istóriku ida-ne’e no hein katak ba oin artisita timoroan hotu sei kontribui diak liu tan ba Timor-Leste nia progresu dezenvolvimentu.

“Apoiu ida-ne’e  simples no dala ruma la iha valor, maibé hanesan Timoroan  iha obrigasaun atu kontribui saida de’it ba rai doben Timor-Leste, liu hosi área sira ne’ebé bele ajuda ita-nia Estadu,” Raul Lemos hateten.  

Jornalista: Vito Salvadór