Investigadór PCIC Na’in-13 Presta Deklarasaun iha CAC

Hatutan.com, (09 Dezembru 2024), Díli- Diretór  Nasionál Polícia Cintifica de Investigação Criminal Timor-Leste (PCIC), Vicente Fernandes e Brito, Segunda (09/12/2024),  konfirma katak iha dunik investigadór PCIC nian hamutuk na’in-13 mak ba presta deklarasaun iha Comissão Anti Corupção (CAC), maibé kona-ba konteúdu la informa ba nia tamba ne’e konsidera hanesan segredu justisa.

Lee Mós: CAC Notifika Dirijente Sira PCIC Nian Presta Deklarasaun ba Kazu Abuzu Podér

Diretór Nacional bá Policia Científica e de Investigação Criminal (PCIC), Vicente Fernandes e Brito. Foto/Elio dos Santos

Diretór Nasionál PCIC, Vicente Fernandes e Brito hato’o deklarasaun ne’e ba jornalista sira iha edifísiu Ministériu Finansas, Ai-tarak Laran, Díli no deklara mós katak nia parte la ba hato’o deklarasaun iha CAC, maibé investigadór sira PCIC mak ba presta deklarasaun hodi komplementa investigasaun ne’ebé CAC halo.

“Ha’u la ba presta deklarasaun iha CAC, ita-nia investigadór sira mak ba presta deklarasaun hanesan sasin. Kona-bá saída ne’e ha’u la hatene, husu ba ita-nia Komisáriu CAC sira mak hatene,” Vicente Fernandes e Brito hateten.

Nia hatutan kona-bá presta deklarasaun ne’ebé investigadór PCIC sira ba presta iha CAC, ba kazu saida nia la hatene maibé bainhira iha parte balun bolu nia sei esklarese.

“Ha’u la hatene kazu ne’e, kazu konkretu ha’u la hatene, buat ne’ebé loos mak sira ba dunik presta deklarasaun iha CAC, ha’u autoriza sira ba dunik presta deklarasaun, maibé kazu saida, ha’u la hatene, Iha investigadór hamutuk 13 mak ba presta deklarasaun,”  nia tenik.

Diretór Nasionál PCIC argumenta katak PCIC ne’e kuandu nia asume iha 2015 ne’e zero, laiha buat ida, agora forte no forte la halimar até kazu lubuk ida PCIC atende, hanesan kazu scamming osan millaun $42 ne’ebé PCIC konsege deteta no halo apreensaun, tamba ne’e atu kombate krime organizadu labele ko’alia, maibé tenke servisu.

“Ha’u prontu kualker oras ba país ida-ne’e,” Diretór Nasionál PCIC, Vicente Fernandes e Brito afirma tan.

CAC LaihaAautoridade Investiga Diretór PCIC

Diretór Nasionál Polícia Cintifica de Investigação Criminal Timor-Leste (PCIC), Vicente Fernandes e Brito, argumenta CAC laiha kbi’it ka podér atu bolu nia tamba hanesan majistradu Judisiál iha prosedimentu própriu para regulariza nia.

“CAC la iha autoridade bolu ha’u tamba ha’u Majistradu, so Ministériu Públiku de’it tamba ha’u Majistradu Judisiál iha prosedimentu própriu para regulariza, Majistradu ne’e hatene lei, abuzu podér akontese kuandu benefísiu ba ha’u, mais kuandu ha’u jere ba interese públiku la eziste, tamba abuzu podér ne’e ho intensaun benefísiu ba an rasik,” Vicente Fernandes e Brito hateten.

Nia subliña hanesan prokuradór, kuandu asume knaar hanesan Diretór PCIC tenke garante transparénsia, independente no prinsípiu legalidade, ne’ebé kontein iha prosesuál no konteúdu penál.

CAC kontinua prosesu investigasaun ba dirijente sira PCIC

Komisáriu CAC, Rui Pereira hateten prosesu investigasaun ne’ebé CAC halo ba dirijente sira PCIC nian lo hela no CAC sei kontinua ho prosesu ne’e ba oin.

Nia afirma kazu sira ne’e sei iha prosesu hela, iha rai ida-ne’e, keixa ruma hasoru sesé de’it, kuandu tama iha kompeténsia CAC nian, CAC halo prosesu investigasaun, se nia tama iha prosesu PCIC nian, PCIC mak halo prosesu investigasaun kriminál no se tama iha kompeténsia PNTL nian sira mak sei trata. Portantu sasán sira ne’e nia referénsia ba fali órgaun sira ne’ebé mak atu halo investigasaun kriminál ne’e.

“Ha’u hanoin Komisáriu labele temi de’it ida PCIC, ami sei halo prosesu hela, identifika, sesé mak sei bolu, sesé mak atu mai tan presta deklarasaun tamba servisu investigasaun kriminál ne’e, ita hatete ema ne’e envolve presiza prova no prova mai husi testemuña sira, dokumentu sira ne’ebé maka hatudu. Maibé, ne’e la’ós ba PCIC de’it, sira seluk ne’ebé ami investiga hanesan de’it, liu-liu ami tenke kumpre ba kódigu prosesu penál nia,” Komisáriu Rui Pereira esplika.

Komisáriu  CAC ne’e subliña liután katak CAC tau prioridade ba buat ne’ebé boot, aleim de kazu sira ne’ebé CAC halo ne’e, CAC mós tau importánsia ba UNCAC ne’ebé hatudu Timor-Leste nia rangking hahú di’ak fali ona no sei nafatin hadi’a ho servisu sira ne’ebé CAC halo ba oin.

Jornalista : Vito Salvadór