Tinan Foun Hahú ho Bensan Maromak Nian

Hatutan.com, (01 Janeiru 2025), Viqueque– Amu Parókia Igreja Imaculada Conceição Viqueque, Thomas de Aquino Guterres Lopes iha selebrasaun misa tinan foun  01 fulan-Janeiru 2025 hateten hahú tinan foun ho bensan na’i maromak nian.

Lee Mós: Loron Ikus Bá Tinan 2024, Husu Ema Hotu Hasa’e Agradese ba Na’i Maromak

Igreja Parókia Imaculada Conceição Viqueque. Foto/Zita Menezes

“Ita hahú tinan foun ho bensa Maromak Nian iha primeira leitura iha livru Isaias, oinsá mak Maromak haraik bensan bá nian povu Izraél sira, Maromak nafatin kuidadu ita ida-idak maske buat hotu bele muda iha ita-nia moris, mundu bele mosu buat oin-oin, maibé Maromak domin Na’i nafatin tau matan bá ita liuhosi Nia tulun no bensan sira,” Padre Thomas de Aquino Guterres Lopes haktuir iha nia omilia.

Paróku  ba Igreja Imaculada Conceição Viqueque ne’e hateten hahú ona  tinan foun 2025, ohin selebra mós solenadade Na’i Feto Maromak Nia Inan ka Maria mãe de Deus.

“Festa ida ne’ebé ita tau kedan iha inísiu tinan foun nian atu fó hanoin fila-fali bá ema hotu-hotu ne’ebé moris iha mundu  ne’e. Bá ema fiar na’in sira katák ita Maromak nian oan, Maromak hadomi tebes ita fó moris bá ita no Maromak kontinua kuidadu nafatin  ita iha tinan ida-ne’e nian mahon Jesus Nian Inan, Maromak Nia Inan no ema hotu nian Inan,” Amu Thomas de Aquino hateten.

Hahú tinan foun ida-ne’e ho ema ida-idak ninian espetativa ho ema ida-idak nian hanoin no hakarak sira oinsá bele hala’o moris iha tinan ida-ne’e nian laran, oinsá  bele moris nafatin iha mundu ne’e, keta haluha atu nafatin fó fiar tomak bá na’i maromak liuhosi inan doben na’i feto ninian ilás, ida-ne’e mak ema hotu husu atu moris iha tinan ida-ne’e nian laran.

Tuir observasaun Hatutan.com durante selebrasaun misa tinan foun, 01 fulan-Janeiru 2025 iha Munisípiu Viqueque  la’o ho hakmatek no hetan seguransa másimu husi Polísia Eskuadra sira iha área jurisdisaun PNTL Munisípiu Viqueque.

Jornalista Estajiária : Zita Menezes