Prezidente Tribunál Rekursu Deklara Kazu Fujitivu Arnolfo Teves Jr Kontinua La’o iha STJ-TL

Hatutan.com, (15 Janeiru 2025), Díli-Prezidenti Tribunál Rekusu (PTR), Deolindo dos Santos,  hateten kazu \fujitivu Arnolfo Tevez Jr, kontinua ao iha Supremu Tribunál Justisa Timor-Leste (STJ-TL)  tanba ne’e nia parte seidauk  bele  fó informasaun ka desizaun ruma.

Lee Mós: Governu Kontínua Hein Desizaun Tribunál Kona-bá Fujitivu Arnolfo Teves Jr

Prezidente Tribunál Rekursu, Deolindo dos Santos. Foto/Zita Menezes

Prezidente Tribunál Rekursu, Deolindo dos Santos  hateten lia hirak ne’e bainhira jornalista husu kona-bá desizaun bá kazu Arnolfo Tevez Jr, sidadaun no nasionalidade Filipina sai fujitivu no hetan red notice hosi INTERPOL.

“Imi na’in hira hatene hela agora kazu ne’e iha hela Tribunál Rekursu, agora imi husu ha’u atu hateten saida. Prezidente Tribunál Rekursu labele ko’alia buat ne’ebé mak juis atu deside, prezidente labele antesipa desizaun sira ne’ebé mak nia atu  foti fali ne’e labele, ne’ebé husu respeita tomak bá imi na’in hira hakru’uk tomak bá imi na’in hira mais ha’u labele hateten,” PTR Deolindo dos Santos  lia-tun ba jornalista sira iha Parlamentu Nasionál, Kuarta (15/01/2025).

 “Ne’e la’ós tanba ha’u mak lakohi hateten mais obrigasaun legál ne’ebé mak hateten katak ha’u labele hateten duni bá ita-boot (jornalista-red) sira bá públiku, ita boot sira sei hatene bainhira desizaun sai mai ona,” Nia tenik.

Molok ne’e, iha loron-Segunda, 02 fulan-Dezembru 2024, koletivu husi juis sira iha Supremu Tribunál Rekursu deside estradita fujitivu Arnolfo Teves Jr ba nia país orijen Filipina.  Maibé tuir transmite Lei nian iha posibilidade parte sira ne’ebé la konkorda ho desizaun ne’e atu rekorre, no depois  rekorre mak iha rekursu karik mak plenária sei haree fali prosesu ne’e  ba oin.

Lembra fali katak fujitivu red notice hosi Organizasaun Internasionál Polísia Kriminál (INTERPOL, sigla inglés) ho naran kompletu Arnolfo “Arnie” Alipit Teves Jr ka Arnolfo Teves Jr, tama iha territóriu Timor-Leste iha loron (la fiksa), fulan-Abríl 2023 ho aviaun jet privadu hamutuk ho nia feen no oan-feto.

Durante hela iha  Díli-Timor-Leste,  Arnolfo Teves Jr halo esforsu oioin atu bele hetan azilu polítika, inklui halo komunikasaun ho figura importante balun iha Timor-Leste  atu bele fasilita nia tama Eropa, maibé esforsu sira-ne’e la konsege no la hetan aseitasaun.   

Eis membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9) inklui Governadór  Negru Oriental, Roel de Gamo hetan kapturasaun no detensaun  hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.

Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera  Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.

Eis  lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés)  iha fulan-Fevereiru 2023. Notifikasaun  red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.

Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia.

Jornalista Estajiária: Zita Menezes