Hatutan.com, (23 Dezembru 2024), Díli— Ministru Justisa, Sérgio de Jesus Fernandes da Costa Hornai, informa Governu Timor-Leste kontínua hein desizaun saida de’it mak mai hosi Supremu Tribunál Justisa (STJ) ligadu ho prosesu sira ne’ebé daudauk ne’e la’o hasoru fujitivu Arnolfo Teves Jr ho nasionalidade Filipina.

Lee Mós: Supremu Tribunál Rekursu Deside Estradita Fujitivu Arnolfo Teves Jr bá Filipina

Fujitivu Arnolfo Tevez Jr, sai sasin iha TJPID bá membru PCIC husu osan $2.000 bá nia oan mane atu garantia nia iha prizaun. Foto/Dok.Elio dos Santos da Costa.

Iha loron 22 to’o 23 no kontínua tán iha  loron 30 fulan-Outubru 2024, STJ hahú hala’o prosesu re-julgamentu nian hasoru fujitivu Interpol Teves Jr. Iha Segunda, 2 Dezembru 2024, Supremu Tribunál Justisa (SJT), liuhosi leitura akórdaun, konklui ona nia desizaun bá estradisaun ninian.

“Sé Tribunál iha ona desizaun bá ida-ne’e, ha’u hanoin, ita tenke komprometidu  atu bele halo ezekusaun bá iha tribunál ninia desizaun própria,” Ministru Justisa, Sérgio Hornai, hatán bá Hatutan.com hafoin serimónia despedida ho formandu legál na’in-24 iha edifísiu sentrál Ministériu Justisa iha Caicoli-Díli, Segunda (23/12/2024).

Biar Supremu Tribunál Justisa konklui tiha ona prosesu ida ne’e iha faze re-julgamentu nian, maibé, STJ kontínua fó tempu bá parte defeza sira atu hola pozisaun kontraditóriu ruma liuhosi halo rekursu. Tuir prazu legál bá períodu submisaun rekursu ne’e to’o loron tolu-nulu (30).

Hatutan.com halo ona konfirmasaun ho Advogadu Timoroan ida ne’ebé durante ne’e fó asisténsia legál, José Ximenes, liuhosi kontaktu WhatsApp kona-bá pozisaun defeza nian bá sira-nian kliente Arnolfo Teves Jr, maibé, nia hatán katak, tempu badak sei hatama fila-fali rekursu bá Tribunál.

Prosesu legál sira hasoru fujitivu Teves Junior ne’e responsabiliza hosi Juíza Konselleira Jacinta Correia ho Juis segunda klase na’in-rua hosi Tribunál Judisiál Primeira Instánsia Dili (TJPID).

Jornalista: Rogério Pereira Cárceres