Relatóriu Câmara de Contas: Osan PNDS Millaun $30-liu “Lalakon”

Hatutan.com, (15 Janeiru 2025), Díli- Relatóriu Kamara bá Konta nian (Câmara de Contas/CdC) hatudu katak orsamentu liu millaun $30 ne’ebé aloka ba Programa Nasionál Dezenvolvimentu Suku (PNDS)  “lakon”.

Lee Mós: Tribunál Konta Bele Halo Auditoria bá Projetu Peskiza Armazén Kombustivel ho Kustu Millaun $3

Prezidente Tribunál Rekursu (PTR), Deolindo dos Santos. Foto/ Elio dos Santos da Costa.

Prezidente Tribunál Rekursu (PTR), Deolindo dos Santos  hateten tuir apresiasaun CdC ne’ebé rekolla katák Orsamentu Jerál Estadu (OJE) 2023 ne’ebé VIII Governu aloka bá Programa PNDS  lalakon tanba la kumpre prinsípiu  ka lei ezekusaun OJE ne’ebé tuir loloos osan sira Estadu nian la ezekuta tenke fila ba kofre Estadu. Maibé to’o agora osan PNDS nian ne’ebé la ezekuta ho montante liu millaun $30 seidauk fila ba konta jerál Estadu.

“Kona-bá PNDS hanesan tuir apresiasaun CdC depois ami rekolla hotu  katák osan PNDS nian la kumpri buat ida ne’ebé hateten katák osan ne’e tuir loloos kada tinan fila-fali bá konta jerál estadu mais la kumpri,” Prezidente Tribunál  Rekursu (PTR), Deolindo dos Santos hateten iha PN hafoin halo audiénsia públika ho Komisaun C-PN, Kuarta (15/01/2025).

CdC rekomenda nafatin para fó fila-fali osan ne’e mais antes ohin  mai halo aprezentasaun Ministériu Estatál kumpre tiha ona tanba halo diploma ida hateten katák antes la’o bá oin ne’e osan sira ne’e devolve hotu mai konta  estadu.

Iha sorin seluk Prezidente Komisaun C-PN ne’ebé trata asuntu Finansa Públika, Deputada Cedelizia Faria dos Santos, hateten, Tribunál Rekursu husu atu Governu sira haree mak ida ko’alia  kona-bá orsamentu ne’ebé transfere bá sede suku sira.

“Ita-boot sira hatene katák ita nian Primeiru Ministru mós preokupa osan lakon, iha relatóriu ne’e hateten orsamentu ne’e barak tau iha transferénsia públika bá tiha konta suku, maibé la transfere bá sede suku sira,” Deputada Cedelizia Faria dos Santos hateten.

“Ami nian haree orsamentu ne’e tau hela iha  konta suku nian, tanba bainhira VIII Governu halo Lei Orsamentu  hateten bainhira osan ne’e la hotu husik hela iha suku nian konta bankária entaun la identifika,” Nia tenik.

Membru Bankada CNRT ne’e hateten agora IX Governu halo ona lei orsamentu katak bainhira osan hirak ne’e la hotu sei entrega fila-fali bá konta jerál estadu nian.

Jornalista Estajiária: Zita Menezes