Lista Veteranu Ne’ebé Públika Ona Labele Hamosu Injustisa

Hatutan.com, (17 Janeiru 2025), Díli– Prezidenti Komisaun A  Parlamentu Nasionál ne’ebé trata asuntu Lejislasaun no Justisa, Patrocinio Fernandes, espera katak  lista veteranu ne’ebé públika ona iha loron  15 fulan-Janeiru 2025  la bele hamosu fali injustisa sosiál.

Lee Mós: PPN Husu Komisaun Independente MACLN-CCLN Halo Fiskalizasaun ba Lista Veteranu Rejistu 2009

Prezidente Komisaun A PN ne’ebé trata assuntu Lejizlasaun no Justisa, deputadu Patrocinio Fernandes.

“Ha’u hanesan reprezentante povu ne’e ha’u nia esperansa katák publikasaun dadus sira ne’e liuhosi prosesu verifikasaun, depois  aprovasaun depois ita sempre iha espetativa ida katák rezultadu sai ne’e tenke fó satisfasaun bá ema hotu,” Deputadu Patrocinio Fernandes hateten  bá Jornalista sira iha PN, Sesta (17/01/2025).

Nia afirma ema ne’ebé merese, bele, no  sira ne’ebé la merese Ministériu Asuntu Kombatente no Libertasaun Nasionál (MACLN) tenke iha korajen no brani hodi hateten katák nia la merese, no hein katák Ministériu relevante ne’ebé tau matan bá asuntu ne’e bele fó respostá relasiona públiku sira nian preokupasaun no opiniaun.

“Fiar katák dadus ne’ebé públika sai prosesu lubuk ida estadu investe osan lubuk mak hodi halo prosesu sira ne’e  hein katák labele hamosu fali insjustisa sosiál.”Tenik Deputadu Patrocinio Fernandes.

Iha fatin hanesan kombatente rejistadu Carlos da Purficasão ho naran kodigu rezisténsia nian “Mota Culi” husi Suku Ataas, Postu-Administrativu Atabae, Munisípiu Bobonaro, la satisfás ho desizaun parte sira nian, nune’e nia ba hasoru membru PN sira hodi hato’o nia lamentasaun ne’e atu parte sira bele hadi’a.

“Ha’u nian problema mak lista veteranu nian ne’ebé públika ne’e la justu tanba sira ne’ebé mak tinan ki’ik husi 1985 bá leten ne’e sira  mak hetan fali grau 2. Ami ne’ebé tinan boot uluk ema kaptura ami no halo torturasaun bá ami hetan tán prizaun preventiva ho prolongada ami hetan fali grau 3 a 7, ne’e ha’u la konkorda,” Carlos da Purficasão “Mota Culi” hateten iha PN.

Carlos da Purficasão kodigu “Mota Culi” la satisfás katák sira  ne’ebé uluk la tama iha liña ukun aan ninian ne’e sira ne’e mak hetan fali grau 8 a 14.

“Tán ne’e mak ohin ha’u mai Parlamentu Nasionál atu hasoru komandante Domingos Augosto “Deker “ para atu fó netik rekomendasaun ruma bá komisaun CCLN, ami presiza hamutuk mak bá halo reklamasaun,” Nia tenik.

 Jornalista Estajiária : Zita Menezes