Hatutan.com, (17 Janeiru 2025), Díli-Prezidente Parlamentu Nasionál (PPN), Maria Fernanda Lay, husu komisaun independente iha Ministériu Asuntu Kombatente no Libertasaun Nasionál (MACLN, sigla portugés) no Konsellu Kombatente Libertasaun Nasionál (CCLN, sigla portugés), halo fiskalizasaun direita ba lista veteranu rejistu 2009 ne’ebé hamosu polémika iha sosiedade.

Lee Mós: Públiku Bele Submete Reklamasaun bá Lista Veteranu Ne’ebé Fó Sai Ona

Komunidade sira hakat ba kuadru avizu hodi haree naran veteranu sira ne’ebé rejistu iha tinan 2009. Foto/Tome da Silva

Prezidente Parlamentu Nasionál (PPN), Maria Fernanda Lay hato’o deklarasaun ne’e hodi hatán ba pergunta husi jornalista kona-bá Parlamentu Nasionál nia fiskalizasaun ba iha lista veteranu rejistu 2009 ne’ebé sai polémika.

“Ha’u hanoin lista ne’e dezde tinan hirak liubá depois adia tiha, klaru katak implementasaun la’ós de’it iha veteranu, maibé ha’u fiar katak komisaun ne’ebé tau matan ba veteranu sira bele tau matan ba halo fiskalizasaun,” Maria Fernanda Lay ba jornalista sira iha Palásiu Prezidensiál, Sesta (17/01/2025).

PPN hatutan  agora Parlamentu Nasionál seidauk ba halo fiskalizasaun tanba foin rona iha média maibé komisaun kompetente iha atu halo fiskalizasaun.

Antes ne’e, Ministru Asuntu Kombatente no Libertasaun Nasionál (MACLN, sigla portugés), Gil da Costa Monteiro “Oan Soru” husu   públiku atu submete  reklamasaun ho  evidénsia bá lista veteranu ne’ebé rejista iha tinan 2009 ne’ebé fó sai ona validasaun iha Kuarta, 15 fulan-Janeiru 2025.

“Lei iha ne’ebá klaru hela atu halo reklamasaun hasoru ema ne’ebé la merese. Reklamasaun hatama mai para hodi hasai tiha,” Ministru Gil da Costa Monteiro “Oan Soru” bá Jornalista sira iha Edifísiu MACLN, Kinta (16/01/2025).

Ministru MACLN ne’e afirma la signifika lista ne’ebé taka iha ne’ebá ne’e definitivu, tanba lei mak haruka, MACLN  bele kumpre de’it nia devér administrativamente hasai juridikamente bá lei.

“Halo reklamasaun maibé tenke ho evidénsia. Labele tanba ódiu malu tanba partidu hadau malu feto-mane, ne’e regra sé nian halo reklamasaun mak la bazeia bá evidénsia  ne’e labele,” Nia tenik.

MACLN taka sai lista ne’e para hetan reklamasaun, mais halo protestu iha média sosiál tau tuun tau sáe ne’e la konta tenke halo reklamasaun halo ho eskrita tanba formatu reklamasaun nian iha munisípiu iha hotu ona.

Jornalista: Vito Salvadór