STAE Distribui Materiál Sensitivu-Naun Sensitivu bá Suku Foun 18

Hatutan.com, (21 Janeiru 2025), Díli— Sekretariadu Tékniku Administrasaun Eleitorál (STAE) hamutuk ho Ministeriu Administrasaun Estatál (MAE) no Komisaun Nasionál bá Eleisaun (CNE) hala’o distribuisaun materiál sensitivu ho naun sensitivu bá suku foun 18.

Reprezentante hosi Sekretariadu Tékniku Administrasaun Eleitorál (STAE) hamutuk ho Ministériu Administrasaun Estatál (MAE) no Komisaun Nasionál bá Eleisaun (CNE) hala’o distribuisaun materiál sensitivu ho naun sensitivu bá suku foun 18, iha STAE Nasionál Caicoli, tersa (21/01/2025). Foto: Lázaro Pereira Quefi.

Materiál sensitivu no naun sensitivu hirak ne’e sei utiliza iha eleisaun órgaun suku iha loron 25 fulan Janeiru 2025.

Lee Mós: STAE Distribui Buletín Votu, FONGTIL Prefere Jerasaun Foun ho Kualifikasaun Akadémika Mak Lidera Suku

Empreza Gráfica NaCional Lda, mak hetan fiar hosi MAE hodi halo imprime bá materiais operasaun, fornesimentu servisu imprime buletin votu bá eleisaun lideransa komunitária hanesan boletin xefi suku, buletin xefe aldeia, buletin delegadu, buletin joventude feto no mane no imprimi banner, stiker, akta no livru manuál formasaun ne’ebé sei uza iha eleisaun suku.

Vise Ministru MAE, Jacinto R. G. de deus hateten materiál sira ne’e hodi transporta bá munisípiu tomak nune’e iha 24 Janeiru distribui bá sentru votasaun hamutuk 70 iha aldeia 70 ne’ebe iha.

“Ita hala’o tán aktu demokrátiku ida-ne’e hanesan pasu importante ho prosesu ida bá eleisaun nian. Ne’e la’ós buat foun ba ita. Ami hein katak materiál sira ne’e hosi parte hotu-hotu sei kuidadu ho di’ak atu bele to’o bá sentru votasaun sira bele la’o ho di’ak no susesu,” Jacinto Rigoberto hateten iha STAE Nasionál Caicoli, tersa (21/01/2025).

MAE tau konfiansa tomak bá STAE, autoridade munisipiu, seguransa, suku sira no bá hirak ne’ebé mak involve iha prosesu eleisaun ne’e garante la’o ho di’ak hodi hatudu bá povu katak buat hotu-hotu la’o ho dignu.

Iha fatin hanesan Prezidente CNE, José Belo dehan eleisaun ne’e fó oportunidade tebes bá Timoroan hotu maski suku no aldeia oitoan mak atu tuir eleisaun maibé ho substánsia oinsa atu habelar nafatin halo preparasaun atu la’o ho di’ak hodi sai nafatin komitmentu Estadu.

CNE ho STAE nasionál no mós STAE munisipiu sira durante ne’e koordena malu di’ak tebes atu suku sira ne’ebé mak tama bá eleisaun halo mós edukasaun sívika ho ezersisiu oitoan hodi esplika simulár sira ne’ebé atu aprezenta hodi sai suku karik bele hatene sira nia direitu, dever no responsabilidade.

Diretór Jeral STAE Nasional Elviru Fernandes Moniz sita Dekretu Governu númeru 5/202426 de Dezembru hamutuk suku 18 mak sei hola parte iha eleisaun órgaun suku ida ne’ebé sei realiza iha loron 25 janeiru 2025.

Tuir natureza Lei suku númeru 9/2016 no Dekretu Governu númeru 14/2016 órgaun eleitorál nia kompeténsia maka presta apoiu ka presta asisténsia bá autoridade munisipiu partikularmente bá iha órgaun suku sira, assemleia aldeia no konsellu suku iha prosesu konstituisaun meza, aprezentasaun kandidatura, prosesu eleisaun, kontazen no mós bá apuramentu rezultadu.

Hosi suku 18 ne’e sei eleitu 87 membru konsellu suku ne’ebé kompostu hosi xefi suku 18, lia na’in 14, joven mane 14, joven feto14, xefi aldeia 9, delegadu 9 no delegada 9 tanba ne’e eleisaun ida ne’e sei iha eleitór hamutuk 24.126  mak sei ezerse sira nia votu.

Prosessu aktu eleitorál ne’ebé la’o tiha ona iha aprezentasaun kandidatura bá xefi suku hamutuk 55 kompostu hosi mane 52 no feto 3.

Tanba ne’e, termu entrega materiál ne’e kompostu hosi material sensitivu  no naun sensitivu mak hanesan bulletin votu bá xefi suku hamutuk 552 livrus, kada livru iha 50 follas no bulletin votu bá xefi aldeia hamutuk 74 livru ho delegadu 46 livrus bá joventude mane, feto 36 livrus no mos urna 105.

Totál suku 18 ne’ebé atu realiza eleisaun suku iha loron 25 janeiru 2025 mak hanesan tuir mai ne’e;

Suku Hurai Raco, postu administrativo Aileu Vila, Munisipiu Aileu.

Suku Karahili, postu admnistrativo Remexio, munisipiu Aileu.

Suku Builai, postu administrative Baucau, munisipiu Baucau.

Suku Caibada Macasae, postu administrativo Baucau, minisipiu Baucau.

Suku Ueru-mata, postu administrativo Laga, munispiu Baucau.

Suku Poetete, postu administrativu Ermera, munisipiu Ermera.

Suku Poetete lodudu, postu administrativo Ermera, munisipiu Ermera.

Suku Poetete Vila, postu administrativo Ermera, munisipiu Ermera.

Suku Koaliate Leten, postu administrative Hatulia A, munisipiu Ermera.

Suku Assu-lau, postu administrativu Letefoho, munisipiu Ermera.

Suku Buduro, postu administrativo Lautem, munisipiu Lautem.

Suku Laku mesak, postu administrativo Laclo, munisipiu Manatuto.

Suku Ili-huli, postu administrative Manatuto, munisipiu Manatuto.

Suku Tahu Bein, postu administrative Alas, munisipiu Manufahi.

Suku Mone Meco, postu administrativu Pante Makasar, RAEOA.

Suku Cutete, postu administrativo Pante Makasar, RAEOA.

Suku Macadique de Baixo, postu administrativo Uatulari, munisipiu Viqueque.

Suku Macadique Uaitame, postu administrativo Uatulari, munisipiu Viqueque.

Jornalista Estajiáriu: Lázaro Pereira Quefi