23-24 Janeiru, Ministra Reinu Unidu ba Indo-Pasífiku Catherine West Vizita Timor-Leste

Hatutan.com, (22 Janeiru 2024), Díli- Ministra Reinu Unidu ba Indo-Pasífiku, Catherine West sei vizita Timor-Leste iha loron 23-24 fulan-Janeiru 2025 hodi renova fali kompromisu Reinu Unidu nian atu apoia Timor-Leste nia adezaun ba ASEAN no reforsa apoiu liu hosi programa dezenvolvimentu Reinu Unidu nian.

Lee Mós: Reinu Unidu Apoiu Timor-Leste Nia Adezaun bá Komunidade Ekonómiku ASEAN

Ministra Reinu Unidu ba Indo-Pasífiku Catherine West. Foto/Espesiál

Komunikadu imprensa ne’ebé Hatutan.com asesu, Kuarta (22/01/2025), informa Ministra Reinu Unidu ba Indo-Pasífiku Catherine West sei hasoru-malu ho Primeiru-Ministru Kay Rala Xanana Gusmão no figura seniór sira seluk hodi diskute asuntu xave sira ne’ebé relasiona ho relasaun bilaterál Reinu Unidu no Timor-Leste.

Ministra Catherine West mós sei partisipa iha eventu ‘Feto iha Diplomasia’ ne’ebé organiza husi Ministériu Negósiu Estranjeiru Timor-Leste no UN Women. 

Ministra Reinu Unidu ba Indo-Pasífiku Catherine West hateten ne’e mak vizita dahuluk nu’udar Ministra Indo-Pasífiku ba Timor-Leste, nasaun ne’ebé riku ho kultura, istória no potensialidade. Kompromisu nasaun nian ba dezenvolvimentu sustentável no ninia partisipasaun ativu iha rejionál no globál sinál ambisaun ida atu hala’o papél importante iha nível internasionál.

Reinu Unidu nafatin iha kompromisu atu apoia Timor-Leste nia adezaun ba ASEAN tanba kontinua dezenvolve nia potensialidade ekonómika. 

“Ha’u hein atu hasoru malu ho Primeiru Ministru no ami-nia parseiru Timor-Leste no interIokadór internasionál sira hodi diskute meius sira ne’ebé Reinu Unidu no Timor-Leste bele promove ami-nia parseira ba ami-nia kreximentu ida-idak,”  Ministra Reinu Unidu ba Indo-Pasífiku Catherine West hateten.

Embaixadór Reinu Unidu ba Timor-Leste Dominic Jermey hateten nasaun rua ne’e sai ona belun iha tempu naruk, no Reinu Unidu sai ona uma ba timoroan lubun iha rai liur.

“Ami hakarak haree Timor-Leste kontinua dezenvolve hanesan nasaun ida ne’ebé estável no prósperu, no ami sei kontinua fo apoiu ba Timor-Leste nia progresu atu kompleta orientasaun sira hodi sai membru kompletu iha ASEAN,” Dominic Jermey hateten.

Iha sorumutuk entre Ministra Reinu Unidu ba Indo-Pasífiku Catherine West no Primeiru-Ministru Kay Rala Xanana Gusmão sei termina ho deklarasaun imprensa ka komunikadu imprensa ne’ebé sei realiza iha loron Kinta, 23 fulan-Janeiru, hale’u tuku 15.30 Otl.

Jornalista: Vito Salvadór