Reinu Unidu Kontinua Apoia TL

Hatutan.com, (23 Janeiru 2025), Díli- Primeiru-Ministru Kay Rala Xanana Gusmão hateten Reinu Unidu kompromete kontinua tulun Timor-Leste (TL), iha área oin-oin ba dezenvolvimentu nasionál país nian.

Primeiru-Ministru (PM), Kay Rala Xanana Gusmão simu vizita hosi Ministra Estadu no Sub Sekretária Estadu Parlamentár Indo-Pasífiku, Reinu Unidu, Catherine West iha Palásiu Governu, Dili, kinta (23/01/2025). Foto: Média GPM.

Primeiru-Ministru Kay Rala Xanana Gusmão hato’o deklarasaun ne’e hafoin simu vizita hosi Ministra Estadu no Sub Sekretária Estadu Parlamentár Indo-Pasífiku, Reinu Unidu, Catherine West iha Palásiu Governu, Dili, kinta (23/01/2025) ne’ebé re-afirma Reinu Unidu nia kompromisu atu kontinua apóiu Timor-Leste.

Lee Mós: 23-24 Janeiru, Ministra Reinu Unidu ba Indo-Pasífiku Catherine West Vizita Timor-Leste

Primeiru-Ministru Kay Rala Xanana Gusmão hateten onradu tebe-tebes hodi simu Sub Sekretária Estadu Parlamentar Indo-Pasífiku Catherine West ne’ebé Reinu Unidu fo ba Timor-Leste.

Xefe Governu haktuir mos katak iha 1999 Catherine West iha Darwin no nia oan moris iha Darwin no Catherine West rasik apoiu tebes ba Timor-Leste nia luta, ne’e dunik kontente tebes no onradu tebes ho vizita ne’ebé Catherine West hala’o mai Timor-Leste.

 Agradese tebes-tebes hodi povu nia naran ba Reinu Unidu nia apoiu tomak tamba Timoroan kuaze liu rihun 30 iha Reinu Unidu ne’ebé servisu iha ne’eba no fo ajuda barak mai família sira iha ne’e. Tinan-tinan millaun $ 20 too $30 mak tama mai hodi apoiu ekonómia família halo uma no haruka oan sira ba eskola.

Primeiru-Ministru subliña Kona-ba ASEAN Reinu Unidu mos kompremete sei apoiu iha area oin-oin hodi mos ita bele tama ba ASEAN.

“Timor-Leste no Reinu Unidu iha prinsípiu ne’ebé hanesan iha polítika internasionál liu-liu prinsípiu  ira,ba promove Pás, estabilidade no Kooperasaun ho rai hotu-hotu.” Hateten Primeiru-Ministru Kay Rala Xanana Gusmão.

Ministra Estadu no Sub Sekretária Estadu Parlamentár Indo-Pasífiku, Reinu Unidu, Catherine West hateten país rua iha istória ne’ebé naruk no ohin liu husi sorumutu ne’ebé iha hamutuk ho Primeiru-Ministru diskute asuntu importante sira ne’ebé país rua kompremete ba.

Nia afirma Diskusaun ho Primeiru-Ministru útil tebes tanba ko’alia kona-bá mekanizmu sira atu hametin parseria iha área oioin inklui preparasaun Timor-Leste nian atu adere bá ASEAN no luta bá direitus umanus.

“Nasaun rua sai ona belun iha tempu naruk. Reinu Unidu sai ona uma bá Timoroan no kontinua apoia Timor-Leste hodi dezenvolve-an nu’udár nasaun prospéru,” hateten Catherine West.

Nia mos haktuir Timor-Leste nia reprezentante iha Reinu Unidu, Embaixadór João Paulo Rangel servisu maka’as hamutuk ho komisun sira iha Reinu Unidu kona-ba kestaun sira ne’ebé importante ba rejiaun ne’e, Inklui mudansa klimátika, dezenvolvimentu ekonómiku, jeopolitiku  no mos kona-ba Timor-Leste nia preparasaun final iha adezaun ba ASEAN, inklui pratika sira ne’ebé Timor-Leste halo iha luta ba direitus umanus.

Durante enkontru Primeiru-Ministru akompaña hosi Ministru Negósiu Estranjeiru no Kooperasaun, Bendito dos Santos Freitas ho Embaixadór TL iha Reinu Unidu, João Paulo Rangel.

Jornalista: Vito Salvadór