Tribunál Kontínua Halo Julgamentu bá José Bernardo Nia Mate iha Sela Polísia

Hatutan.com, (19 Fevereiru 2025), Díli- Tribunál Judisiál Primeira Instánsia Díli (TJPID), Kuarta (19/02/2025), kontinua halo julgamentu bá  kazu José Bernardo Soares nia mate iha sela detensaun Polísia Munisípiu Díli iha loron 01 fulan-Setembru 2022.

Lee Mós: TJPID Halo Re-julgamentu ba José Bernardo Nia Mate iha Sela Polísia

Matebian José Bernardo bianhira sei moris hatais kamiza organizasaun arte-marsiál PSHT no imajen ilistrasaun tara-aan iha sela polísia. Foto/Repro Espesiál

Audiénsia julgamentu ne’e  preside husi juiz koletivu José Escurial, Afonso Carmona no Juiza Francisca Cabral, Ministeriu Publiku reprezenta husi Prokurador Aderito Tilman no arguidu sira hetan asisténsia legal Defensór Públiku, Eustaqui Guterres ho Juvinal Yenes Freitas. Enkuantu José Bernardo hetan asisténsia legal husi  Adelina no Elidio.     

Iha audiénsia julgamentu ne’e Tribunál rona depoimentu husi arguidu TP ne’ebé mak nu’udár membru Polísia Nasional Timor-Leste (PNTL) ne’ebé momentu ne’e lori José Bernardo ba entrega iha sela detensaun.

Iha sala julgamentu Arguidu TP deklara  katak momentu ne’e nia nu’idár investigadór iha Komandu Polísia Eskuadra Vera-Cruz, momentu iha loron 30 fulan-Setembru 2022 dadeer, nia simu keixa ida husi vítima Gaudêncio nia bin, Verdiana heteten katak, mosu konfrontu ida iha aldeia 01, Suku Caicoli no konfrontu ne’e rezutal nia alin kondisaun grave.

TP konfesa katak Momentu ne’e, nia simu keixa husi vítima Gaudêncio nia bin katak nia alin ema baku too grave,  agora baixa ona ospitál nasional no suspeitu ne’ebé baku  vitima ne’e nia  koñese. Entaun momentu ne’e nia rejista tiha kazu ne’e no husu autorizasaun husi Komandante Eskudra Vera-Cruz hodi haklean prosesu ne’e.

“Momentu ne’e Komandante Polísia Eskuadra Vera-Cruz autoriza nia hodi kontinua halo prosesu  ba kazu ne’e. Nune’e, momentu ne’ebá arguidu ho karreta patrulla Vera-Cruz ba kedan haree kondisaun vítima Gaudêncio nian iha ospitál no momentu  nia haree duni vítima Gaudêncio halo hela tratametu iha HNGV  no nia fila mai eskuadra Vera-Cruz hodi kontinua  husu autorizasaun ba Komandante Eskuadra Vera-Cruz hodi lori  supeitu José Bernardo mai tuir prosesu identifikasaun,” arguido TP haktuir.

Nune’e iha loron 30 setembru tuku 12:00 meudia, arguidu TP deskola kedan ba suspeitu José Bernardo nia uma hodi lori suspeitu  José Bernardo hodi submete ba prosesu identifikasaun.

Arguidu esplika, momentu  lori suspeitu husi nia uma  mai submete ba prosesu identifikasaun iha Eskuadra Vera-Cruz, akompaña husi suspeitu nia inan inklui sasin na’in-rua hosi parte vítima  Gaudêncio nian.

¨Momentu halo identifikasaun ba José Bernardo ha’u la halo identifikasaun, maibé ha’u nia Xefe investigasaun mak halo no ha’u akompaña de’it no momentu halo identifikasaun  José Bernardo nia inan mós hein hotu iha sala espera hodi akompaña nia oan,” nia hateten.

Arguidu hateten, hafoin halo tiha identifikasaun ba José Bernardo,  Xefe Investidór orienta nia lori suspeitu  José Bernardo ba sela detensaun Komandu PNTL Caicoli. tanba Eskuadra Vera-Cruz laiha sela, entaun ami tenke lori suspeitu ba sela detensaun Komandu PNTL Dili. Momentu ami lori José Bernardo ba sela, nia inan mos akompaña hotu.

Arguidu deklara katak, momentu ne’e nia entrega José Bernardo ba Tomas Viegas hodi asegura José iha sela detensaun durante oras sanulu resin rua nia laran.

“Momentu ami halo identifikasaun ba suspeitu ami la ameasa nia, nein ko’alia liafuan oin-oin ba nia ( suspeitu) too ha’u lori mai entrega  ba membru Polísia TV hodi  asegura nia  iha sela doze oras  de tempu. Momentu ha’u mak ba entrega José Bernardo  ba TV duni no ha’u haree José Bernardo nia kondisaun di’ak, sem trauma ba  buat ruma. Hakarak hateten tan katak momentu ne’e nia sei koalia hela ho nia inan iha fatin besik sela nian. Depoizde ida ne’e, ha’u fila ona,” nia relata hikas.

Arguidu rekoñese katak,  momentu  asegura  suspeitu José Bernardo  iha sela detensaun durante oras  12, la komunika ba Ministériu Públik ho razaun tanba  polísia asegura José Bernardo iha sela detesaun, razaun  tanba haree ba gravidade krime ne’ebé mak  José Bernardo  komete  todan.

Arguidu TP hateten tuku neen atu ba tuku hitu nia simu infomasaun husi nia maluk polisia ida katak suspeitu ne’ebé ohin imi halo identifikasaun ne’e mate tiha ona, nune’e nia  ba kedan Komandu PNTL Dili hodi haree maibé momentu nia to’o ne’e ba ema barak tiha ona no la konsege ba haree José  Bernardo nia isin mate.

Hafoin rona tiha deklarasaun arguidu TP Tribunal marka fali julgamentu ba loron 27  fulan-Fevereiru 2025, tuku 14:00 (Oras Timor Leste) hodi kontinua rona deklarasaun Arguidu TV nian.

Jornalista: Vito Salvadór