BTL, E.P Lansa Kódigu Konduta no Entrega Karreta 19 ba Tékniku Sira

Hatutan.com, (27 Fevereiru 2025), Díli – Bee Timor-Leste, Empreza Públiku (BTL, E.P), Kinta (27/02/2025),  halo lansamentu kódigu konduta no entrega  karreta  19 ba tékniku asegura operasional BTL,E.P iha terrenu.

Lee Mós: Pose bá Estrutura BTL,E.P, Xanana Afirma Empreza Públika La’ós Emprezáriu Públika

Padre fó bensaun ba karreta operasionál BTL,E.P. Foto/Elio dos Santos da Costa

Karreta sira ne’e destinadu ba iha operasionál bee-moos ho saneamentu iha kapitál Dili no mós kapitál Munisípiu 11.

Ministru Obras Públiku, Samuel Marçal hateten kerreta sira ne’e tenke utiliza tuir nia nesesidade no regra patrimóniu Estadu nian.

“Imi simu buat ruma kuandu la iha fuan atu hadomi rai Timor-Leste no la iha fuan atu hadomi povu maka karreta sira ne’e imi se uza hodi ba hafuhu-festa mak barak tanba ne’e BTL, E.P nia servisu importante tebes liga ho povu nia nesesidade no liga mós ho ema nia vida ho saúde tanba ne’e MOP husu ba funsionáriu sira tau buat sira ne’e iha ulun nune’e imi nia prezensa povu se fó valor ba imi,” Ministru Samuel Marçal hateten.

“Ba ha’u buat tolu de’it mak kaer hanesan konduta hanesan lei ba ha’u ida mak konsiénsia, ida mak hadomi, ida mak tenke brani. Ita atu halo konduta oioin no halo lei barak mas la iha konsiénsia entaun ita se soe de’it. Ita halo buat hotu-hotu mas kuandu la iha hadomi ba ita nia rai, ba ita nia povu, buat hotu ita se soe hotu tanba ne’e karreta sira ne’e uza halo servisu ba ita-nia povu.”

Samuel Marçal hatutan BTL, E.P importante tebes duni ho nune’e ema halerik bee iha fatin ne’ebé de’it tenke ba atende. Tanba ne’e hakarak servisu tenke sai servidór ba Estadu no mós tenke prontu sai atan ba povu.

“Kria kódigu konduta ne’e di’ak, maibé lider sira mak tenkiehatudu uluk ezemplu la’ós sai lider atu fahe de’it oráriu ka fahe servisu ba ema maibé tenke sai ezemplu no sai matadalan ba sira seluk atu tuir,” Samuel Marçal afirma.

“BTL, E.P, EDTL, E.P no MOP mak tenke sai inan no aman ba povu ida ne’e. Sai inan no aman tanbasá bee la iha sira telefona ita, ahi mate sira telefona ita, Estrada monu sira telefona ita importante tebes iha MOP ida ne’e tanba ne’e lalika rona kritika, tolok maibé haree mak servisu tanba rai ne’e presiza ita no povu presiza atu servi,” Ministru Samuel Marçal tenik tan.

Samuel Marçal husu ba servidór ba Estadu sira hotu iha BTL, E.P ne’ebe Prezidente BTL, E.P rasik temi dehan aprova programa entaun husu atu hala’o programa ne’e ba povu ki’ik sira hodi sente.

Iha fatin hanesan Prezidente  Komisaun Ezekutiva BTL, E.P Gustavo da Cruz hateten atividade lansamentu kódigu konduta BTL, E.P nian ne’e hanesan giaun ida atu gia ezekutivu sira iha instituisaun ida ne’e tuir dalan ne’ebe loos no lei ne’ebe mak iha ho ninia prosedimentu admirative legal sira atu empreza bele la’o tuir enkuadramentu legal ne’ebe di’ak.

Esforsu ne’ebé mak halo la’ós de’it ba kódigu konduta ne’ebe mak iha maibé prepara mós regulamentu sira ne’ebe mak hatuur iha dalan ne’ebé loos, ho ida ne’e atu lori Ezekutivu sira hamutuk ho traballadór sira  BTL,E.P hotu hodi atinje meta ne’ebe mak Governu hatuur liu hosi planu estratéjiku dezenvolvimentu nasionál.

“Aleinde lansamentu kódigu konduta ita mós halo entrega  karreta hamutuk (19) ba ita nia diresaun sira no mós koordenadór munisipál 11.  BTL, E.P nia esforsu tomak tuir rekursu finanseiru ne’ebé mak iha entaun ba operasionál iha sidade de’it ami aprova karreta Kery ba iha kapitál Dili no iha kapitál Munisipiu sira no mós iha Pick-Up ida ba iha diresaun tolu para bele ajuda sira ba Administrasaun no mós apoiu diresaun tolu ne’e atu halo servisu iha terrenu,” Gustavo da Cruz hateten.

Kódigu konduta atu guia traballadór sira atu bele halo tuir nune’e karreta hirak ne’e uza ba servisu bee ho saneamentu nian nune’e karreta hotu-hotu se para hotu iha edifísiu se la lori ba Uma kuandu iha nesesidade operasionál mak bele foti .

Kareta hirak ne’e seidauk sufisiente ba territóriu tomak maibé pelu menus bele ajuda ona tékniku sira atu hali servisu. Total orsamentu ba sosa karreta hirak 19 ne’e $200,000.00-

Jornalista Estajiáriu : Lazaro Pereira Quefi