Komisaun F Konfirma Governu Sei Halo Pagamentu Millaun $8.9 Bá Dívida iha Ospitál Estranjeiru Sira

Hatutan.com, (28 Fevereiru 2025), Díli– Parlamentu Nasionál liuhusi  Komisaun F ne’ebé trata asuntu Saúde, Igualdade no Seguransa Sosiál, konfirma katak Ministériu Saúde sei halo pagamentu millaun $8.9 ba iha dívida ka tusan sira Governu Timor nian ho ospitál estranjeiru sira.

Lee Mós: Governu Selu Ona Dívida Estadu Millaun $89 Hela Millaun $200-liu

Prezidente Komisaun F Parlamentu Nasionál bá asuntu Saúde, Seguransa Sosiál no Igualdade Jéneru, Maria Barreto Gorumali. Foto/Zita Menezes

“Kona-bá divida, iha tinan kotuk pagamentu bá iha dívida liur, depois iha tinan ida-ne’e agora daudaun ha’u seidauk hetan informasaun klaru, mais buat ne’ebé mak ami husi komisaun F liuliu ha’u  rona husi parte Minstériu Saúde nian katák agora daudaun atu halo pagamentu  millaun $8.9 bá iha dívida ne’ebé mak iha ho ospitál estranjeiru sira ne’ebé durante ne’e simu pasiente Timoroan sira,” Prezidente Komisaun F PN, Maria Gorumali Barreto hateten iha PN, Sesta (28/02/2025).

Membru Bankada CNRT ne’e hateten sei iha dívida balu ne’ebé mak prosesu fatura hela depois kuandu loos ona mak Minstériu Saúde foin  kontinuasaun halo pagamentu bá  dívida sira ne’e.

Nia hatutan tán katák daudaun ne’e  Minstériu Saúde transferé pasiénte bá rai-li’ur hahú la’o fali ona no tau prioridade bá pasiénte sira ne’ebé mak urjenti tebes no tuir prosedimentu ne’ebé Minstériu Saúde uzá.

Deputada ne’e afirma fatura sira ne’ebé mak husi ospitál estranjeiru sira ne’ebé mak halo kontratu ho Governu Timor-Leste seidauk haruka rezultadu mai MS, klaru Minstériu Saúde seidauk halo pagamentu bá dívida sira ne’ebé mak iha no pasiénte ne’ebé mak nia fatura loos ona mak halo pagamentu.

Jornalista Estajiária: Zita Menezes