Ipolito Soares Eleitu ba Prezidente Ezekutivu LFTL Períodu 2025-2029

Hatutan.com, (01 Marsu 2025), Díli- Órgaun Liga Futeból Timor-Leste liu husi Kongresu da-ruak, Sábadu (01/03/2025),  hili eis Prezidente Assalam FC Ipolito Soares hodi lidera LFTL ba períodu 2025-2029.

Lee Mós: Asembleia Jerál LFTL Diskute Sirkunstánsia Rezignasaun Nilton Gusmão

Prezidente Eleitu LFTL, Ipolito Soares ho Abrão de Oliveira ne’ebé sai mós hanesan kandidatu ba prezidente LFTL iha kongresu daruak LFTL nian, Sábadu (01/03/2025). Foto/LFTL

Iha kongresu da-ruak LFTL ne’e iha Kandidatu Prezidente LFTL na’in-rua mak kompete hanesan  eis Prezidente Assalam FC Ipolito Soares no eis Prezidente Zebra FC Abrão de Oliveira ne’ebé kada kandidatu maioria hetan apoiu husi sira nia proponente no prienxe rekizitu sira kandidatura nian ne’ebé kontempladu iha rejimentu no estatuta LFTL nian.

Tuir ajenda kongresu nian ne’ebé Hatutan.com asesu hatudu katak molok kongresista sira ba hili kandidatu na’in-rua ne’e ida atu lidera LFTL ba períodu 2025-2029, kongresista sira halo hikas eleisaun ba Prezidente Asembleia jerál Órgaun Liga no halo mós alterasaun ba Estatutu Órgaun Liga nian tuir rejimentu ne’ebé iha.

Tama ba ajenda aprezentasaun kandidatu no kampaña, kandidatu na’in-rua hatudu sir- nia matenek, profisionalizmu no identidade atu konkista vitória liu husi aprezentasaun programa para bele hetan influénsia no konfiansa husi kongresista sira ne’ebé iha direitu de votu.

Kandidatu Abrão de Oliveira iha nia kampaña hateten sei servisu ho másimu hamutuk ho parte hotu ne’ebé iha paixaun ba Futeból hodi hamoris Liga, nune’e kompetisaun nivel nasionál la’o ho dinamika liután hodi prodús talentu futebolista ba selesaun nasionál Timor-Leste.

Kandidatu seluk, Ipolito Soares mai ho kompromisu atu hasae subsídiu ba kada klube iha primeira divizaun no Segunda Divizaun, prémiu kampiaun inklui mós taxa ba Prémiu iha kada jogu sira.

Nia afirma bainhira manan sei hasae subsídiu primeiru divizaun sa’e ba $70,000.00, segundu divizaun $30,000.00. Prémiu Kampiaun primeiru divizaun $60,000.00, segundu divizaun $30,000.00 no prémiu ba jogu primeiru divizaun $2,000.00, segundu divizaun $1,000.00. estimasaun osan ba époka ida iha Liga ho Total orsamentu refere ho montante $1,360,000.00.

Hafoin kandidatu rua aprezenta Programa Prezidente meza no komisaun prepara kedas ba votasaun no iha rezultadu votasaun primeiru kandidatu na’in-rua hetan votu hanesan (17-17) no tuir estatutu Prezidente meza mak sei deside ho votu ikus hodi determina se mak mana, maibé tanba presaun psikolójika lori Presidente meja deside fó votu nulu.

Ho votu nulu ne’ebé prezidente meza oferese halo kandidatu rua mantein impata nune’e obriga eleisaun  refere hakat ba segundu ronde.

Tama ba segunda ronde kandidatu eis Prezidente Assalam FC Ipolito Soares ho promesa sira iha leten konsege konvense kongresista sira no manan ho votu 19 no Abrão de Oliveira ho de’it votu 16.

 Hosi estrutura ne’ebe iha Prezidente LFTL Ipolito Soares, primeiru Vise Prezidenti lidera hosi Ozorio Florindo no segundu Vise Prezidente hosi Octavio da Conceição.

Ipolito Soares iha nia diskursu hafoin eleitu hateten eleitu iha kongresu LFTL nian ne’e hanesan vitória ida ba futeból Timor-Leste, nune’e husu ba governu ho FFTL atu nafatin apoiu ba sustentabilidade futeból.

Nia afirma sei esforsu mos buka patrosinadór husi rai-li’ur maibé husu governu kria kondisaun di’ak ba infrastrutura para sira mai ajuda lori futeból Timor-Leste ba oin.

“Ha’u fiar katak sei serbisu hamutuk ho Prezidente FFTL Nilton Telmo dos Santos Gusmão tanba iha paixaun bo’ot ba futebol ne’ebé antes ne’e lori futeból husi LFA to’o mai LFTL, tamba ne’e hamutuk dezenvolve futebol ba jerasaun tuir mai,” Ipolito Soares hateten

MJDAC no FFTL sei apóiu másimu órgaun Liga

Ministru Juventude, Desportu, Arte no Kultura (MJDAC, sigla portugés), Nelio Isaac Sarmento iha nia diskursu abertura hateten bainhira kandidatu sira eleitu tiha iha kongresu ne’e,  sei iha,enkontru triparti entre Governu, Orgaun liga no FFTL  para haree liga atu hahú bainhira, ida-ne’e de’it mak ita espera husi sira.

Nia afirma tanba iha kongresu ne’e sira halo diskusaun ba, hadi’a organizasaun, sira ne’ebé eleitu ne’e trasa planu ba, Governu preparadu no prontu atu ita haree liga ne’e ba oin.

“Kongresu ida-ne’e sinál pozitivu, Governu la husik sira mesak, tanba ne’e mak Governu fó apoiu ba sira inklui futeból sira nune’e liga bele la’o ba oin,” Nelio Issac Sarmento hateten.

Governante ne’e subliña hafoin kandidatu Prezidente LFTL períodu 2025-2029 eleitu tiha teknikamente sei ko’alia detallu kona-ba kustu, fasilidade, regra sira, ne’ebé ita hakarak uza durante liga futeból ne’e la’o.

Governu nia preokupasaun ida mak ita atu realiza liga klube sira presiza iha kondisaun, klube sira atu ba treinu iha ne’ebé, ne’e mós problema ida, depois treinu kampu saída mak sira atu uza, ita iha kampu Gleno, Maliana, Manatuto, Baucau, nune’e mós Dili, ne’ebé intermu  infraestrutura ita di’ak ona, atu klube sira treinu.

Prezidente Federasaun Futeból Timor-Leste (FFTL), Nilton Telmo dos Santos Gusmão hateten ho onra no profundu respeitu maka Futeból la’ós de’it jogu ida, maibé futeból ne’e sai hanesan paixaun nasional, instrumentu ida ne’ebé poderosa ba transformasaun sosiál no mós símbolu Uniaun ba povu.

Nia afirma hanesan Prezidente FFTL, dala ida tan hakarak dehan misaun ida ne’ebé ita hotu tenke halibur hodi halo maka hamutuk ho hanoin ida atu transforma futeból sai orgullu nasionál. Atu hetan objetivu ne’e, órgaun Liga Futeból Timor-Leste (LFTL) sei sai hanesan pilar importante ida atu hamoris paixaun no orgullu nasionál iha ita nia futeból.

“Reativa hikas ita nia Liga Futebol não é apenas uma necessidade desportiva, maibé nu’udár responsabilidade sosiál atu fó esperansa ba juventude Timoroan sira. Ita hakarak ita-nia juventude ho futuru ida ne’ebé klaru, la’ós de’it tama iha atividade destrutivu ne’ebé la fó estabilidade no amizade entre sira. Futeból bele hadi’a mentalidade, fó espasu ba juventude atu aprende kompetisaun no hetan esperiénsia atu hadi’a moris. Ha’u iha konviksaun tomak katak, bainhira ita oferese biban estrutura kompetitivu forte, ita sei ajuda transforma mentalidade juventude timorense, insita disiplina, espíritu iha ekeipa e no ambisaun atu sai vensidor,”  Nilton  hateten.

Prezidente FFTL ne’e subliña Infelizmente, tinan tolu liu ona Timor-Leste la hala’o kompetisaun Liga iha rai laran. Tan ne’e kongresu ida ohin importante tebes at bele hetan lideransa definitivu atu bele lidera órgaun Liga hodi reativa hikas ita nia Liga futeból iha tempo badak, hodi fó oportunidade ba klube sira no juventude atu kontinua sira-nia karreira futeból.

LFTL dezde nia fundasaun, kontribui barak ba promosaun paz, uniaun desenvolvimentu profesional ba juventude. Kompetisaun Liga fó mos esperansa ba jogador sira atu hetan biban atu realisa sira nia mehi sai futebolista nudar sira nia profissão.

“Tan ne’e, hanesan Prezidente FFTL, ha’u hakarak afirma iha ne’e ba ita hotu katak FFTL sei fó apoiu total ba Liga Futebol Timor-Leste atu liga ne’e iha futuru prósimu bele hahú hikas sira nia atividade. Maibé, atu hala’o liga ne’e ho forma regular no sustentável, laos segredu órgaun Liga sei kontinua nesesita apoiu husi Governu no parseiru sira atu nune’e dezenvolvimentu futeból iha ita nia rain bele hetan kbi’it atu organiza,” Nilton tenik.

Jornalista: Elio dos Santos