Hatutan.com, (22 Setembru 2022), Díli-Asembleia Jerál Órgaun Liga Futeból Timor Leste (LFTL) ne’ebé lidera hosi Miguel Manitelo, Kinta (22/09/2022), halo enkontru hodi diskute daudaun sirkunstánsia sira kona-bá pedidu rezignasaun prezidente LFTL, Nilton Gusmão nian.

Lee Mós : Nilton Gusmão Submete Pedidu Rezignasaun Bá Asembleia Jerál LFTL

Prezidente Asembleia Jerál LFTL, Miguel Manitelo. Foto/Vito Salvadór

Hosi enkontru ne’e, deside atu konvoka tan reuniaun kunsultativu ho órgaun  LFTL, inklui konvida mós Nilton Gusmão, nu’udár prezidente LFTL ne’ebé submete ona nia pedidu rezignasaun iha loron 16 fulan-Setembru 2022.

Reuniaun meza asembleia órgaun LFTL nian ne’e kompostu husi Prezidente, vise-presidente no sekretáriu. Maibé Vise-presidente Osório Flórindo, la marka prezensa tamba partisipa iha atividade seluk iha Sekretáriu Estadu Juventude no Desportu (SEJD).

Prezidente Asembleia Jerál LFTL, Miguel Manitelo, hateten enkontru ne’e la diskute ho kle’an karta pedidu rezignasaun hosi Prezidente LFTL, Nilton Gusmão, maibé haree sirkunstánsia sira hotu, ho nune’e, deside atu konvoka fali reuniaun konsultativu ida tuir estatutu LFTL nian hodi rona opiniaun hosi parte hotu nune’e asembleia jerál LFTL bele konvoka reuniaun tuir mai hodi foti desizaun.

Nia afirma kompeténsia ne’ebé meza asembleia la’ós atu deside maibé atu fasilita de’it desizaun sira ne’ebé iha no asembleia mak iha kompeténsia no asembleia ne’e prezide hosi Prezidente, VisePpresidente no Sekretáriu asembleia maibé iha mós membru sira seluk ne’ebé iha mos kompeténsia bá hola desizaun.

“Ami hasai ona konvite ida ba órgaun LFTL nian sira hotu inklui prezidente LFTL, Nilton Gusmão ne’ebé deside rezigna aan ona atu bele mai enkontru hamutuk hodi rona ideia hosi parte hotu relasiona ho rezignasaun ne’e,” Miguel Manitelo informa ba jornalista sira iha sede LFTL, Estádiu Munisipál Díli.

Antigu Sekretáriu Estadu Juventude no Desportu ne’e hatutan asembleia jerál la’o tuir koridor lei no regulamentu ne’ebé regulariza funsionamentu iha estatutu LFTL  nian.

Meza Asembleia LFTL haree ona estatutu no presiza rona órgaun LFTL hotu nia opiniaun molok foti desizaun final relasiona ho rezignasaun Prezidente LFTL.

Iha estatutu LFTL hateten ho klaru katak uainhira Prezidente órgaun LFTL rezigna an nia primeiru vise prezidente sei substitui nia fatin durante loron 90 hodi hein kongresu estraordináriu hodi hili prezidente ezekutivu foun.

Tuir ajenda ne’ebé meza asembleia iha, reuniaun konsultativu ne’e sei realiza iha loron 29 fulan-Setembru ne’ebé sei akumula parte hotu órgaun LFTL nian inklui ho ezekutivu asembleia jerál hotu.

Jornalista: Vito Salvadór