Mensajen Papa Francisco Ba Kuarezma 2025: “Mai Ita La’o Hamutuk iha Esperansa”

Hatutan.com, (04 Marsu 2025), Díli– Sarani Kristaun Katóliku hotu iha mundu, Kuarta, 05 Marsu 2025, sei hahú tama ba tempu hadera án ka kuaresma, ne’ebé sei hahú ho selebrasaun Kuarta-feira Sinzas ho marka ahu-kdesan iha ren-to’os.

Lee Mós: Mgr. Marco Sprizzi husu Timoroan Reza bá Papa Francisco Nia Saúde

Papa Francisco hasé sarani sira bainhira nia sai hosi audiénsia jerál semanál iha loron 01 fulan-Maiu 2024 iha salaun Paulo-VI iha Vatikanu. Foto/Dok.Vatikanu

Konvite importante ne’ebé Papa Francisco fó ba kuarezma  2025 mak “Mai ita lao hamutuk iha esperansa”. Iha publikasaun Mensajen Papa Francisco nian ne’ebé Hatutan.com sita husi Vatikanu News ne’ebé publika iha loron Tersa, 25 fulan-Fevereiru 2025,  Santu Padre konvida sarani fiar nain hotu ho konvite espesiál ida atu “Mai ita lao hamutuk iha esperansa”.

“Ho sinál penitensiál ahu-kdesan nian iha ita-nia ulun leten, ita hahú peregrinasaun anuál Santa Kuarezma nian iha fiar no esperansa, prepara ita-nia fuan no loke an ba Maromak nia grasa atu ita bele selebra ho ksolok boot Kristu nia triunfu paskál hasoru sala no mate,: Papa Francisco iha nia mensajen kuarezmal nian.

Kuarezma ida-ne’e, enrikese ho grasa Tinan Jubileu nian, Amu-Papa oferese reflesaun sira kona-ba saida mak signifika husi La’o Hamutuk iha esperansa.

Lema tinan Jubileu nian kona-ba Peregrinu sira Esperansa nian, lori mai ita hanoin kona-ba viajen naruk povu Israel nian ba Rai Prometidu. Ita sei labele hanoin-hetan ézodu bíbliku sein hanoin kona-ba maun-alin barak ne’ebé, ohin loron, halai hosi situasaun kiak no violénsia nian no bá buka moris di’ak liu ba sira-nia an rasik no ba sira-nia maluk sira.

Ba Papa Francisco, tempu ida-ne’e sei sai ezersísiu Kuarezmal di’ak ida atu konfronta ita-nia an ho realidade konkreta migrante ka peregrinu nian no husik nia kestiona ita, atu bele deskobre saida mak Maromak husu mai ita atu sai viajante di’ak liután ba Aman nia uma Ida-ne’e mak “ezame” di’ak ida ba viajante.

Halo viajen hamutuk: “La’o hamutuk signifika iha unidade, hahú ho ita-nia dignidade nudar Maromak oan, la’o hamutuk ho ema seluk, la ho laran moras ka finjidu, la husik ema seluk iha kotuk. Mai ita kontinua buka atu halo planu ida de’it, rona malu ho domin no pasiénsia.

Papa Francisco mos konvida sarani fiar nain hotu atu iha dalan ida deit ho esperansa ba promesa. Iha liafuan terseiru ne’ebé ita bele ko’alia: esperansa, fiar ba Maromak no ninia promesa boot, moris rohan-laek.

Papa Francisco hakotu nia mensajen kuarezmal ne’e hodi dehan “Iha esperansa no esperansa ne’ebé metin ba ita-nia moris. Igreja halo orasaun atu ema hotu bele hetan salvasaun no hein katak sira sei hela iha lalehan nia glória, ne’ebé ida de’it ba Kristu”.

 Jornalista: Elio dos Santos