Hatutan.com, (24 Fevereiru 2025), Díli-Reprezentante Santa Sé iha Timor-Leste, Mgr. Marco Sprizzi, husu Timoroan sarani Katólika atu halo orasaun bá Sua Santidade Papa Francisco nia saúde ne’ebé daudaun ne’e iha hela kritiku nian laran.

Lee Mós: Santa Sé Agradese no Orgullu ho Povu Timor-Leste Durante Vizita Papa Francisco

Sarani sira entuzizmu simu Papa Francisco iha Díli, 09 Setembru 2024. Foto/Dok.Tome da Silva

“Senseramente hotu-hotu preokupa ho kondisaun Papa nian ne’ebé iha kritikú nia laran, ho kondisaun difisil. Tanba ne’e, presiza orasaun no reza barak liu tán bá rekooperasaun saúde Papa Francisco nian,” Mgr. Marco Sprizzi bá jornalista sira hafoin halo despede ho Parlamentu Nasionál, Segunda (24/02/2025).

Reprezentante Santa Sé  iha Timor-Leste ne’e afirma dadaun ne’e médiku sira halo hela esforsu atu nune’e Papa Francisco bele rekopera husi moras pneumenia no komplikasaun ki’ik sira seluk ne’ebé afeita direita bá Papa nia kondisaun atuál.

“Hein katák Maromak laran lu’ak bele fó bá Santu Padre grasa isin di’ak, atu nune’e, belesSimu peregrinu sira husi rai hotu-hotu inklui Timor-Leste iha tinan Jubileu esperansa nian. Ita hotu iha esperansa bá saúde Papa Francisco,” Mgr. Marco Sprizzi

Nia afirma tán katák misa bá Santu Padre nia saúde, parokia hotu-hotu halo kada loron no iha Nunsiatura no katedrál sempre oferese Misa espesial bá saúde Santu Padre Nian.

Sua Santidade Santu Padre Francisco halo vizita Apostólika mai Timor-Leste iha loron 09 to’o loron 11 fulan-Setembru tinan 2024. Vizita istórika ida-ne’e, parte hosi Viajen Apostólika ba Ázia, sai momentu ida ne’ebé ho bensaun no importánsia boot ida ba Timoroan tomak.

PN Halo Despede no Votu Agradesimentu

Parlamentu Nasionál halo despedida ikus no fó votu agradesimentu ho unaminidade Afavór 57 Kontra zero no Abstensaun zero  bá Mgr. Marco Sprizzi ne’ebé remata ona nian misaun  nu’udár reprezenta Santa Sé iha Timor-Leste durante tinan hitu nian laran (2017-2025).

Reprezentante Santa Sé mai Timor-Leste, Mgr. Marco Sprizzi. Foto/Elio dos Santos da Costa

“Mgr. Marco Sprizzi vizita kortézia mai Parlamentu Nasionál atu despede, tanba nia sei aranka bá Vatikanu ho pozisaun foun ne’ebé mak Santu Padre fó bá nia hanesan ministru, ne’ebé nia sei aranka bá Vatikanu iha fulan-Marsu, tinan ne’e,” Prezidenti Parlamentu Nasionál, Maria Fernanda Lay hateten iha plenária.

PPN afirma hafoin  despede ida-ne’e mak fó hanoin katák Parlamentu Nasionál mós halo votu kongratulasaun, no espera iha serimónia despedida loron 28 fulan-Fevereiru iha Palasiu Presidensiál no Parlamentu Nasionál bele entrega votu bá Mgr. Marco Sprizzi.

Deputadu Bankada CNRT, Romeo  Moises hato’o agradese tebes bá amo Marco Sprizzi ninian dedikasaun tomak ne’ebé fó bá igreja Katoliká iha Timor-Leste, hodi haburas tán Timoroan nian fiar.

“Ho ami nian prezensa bele forsa naftin bá relijiaun katoliká no hanesan Timoroan fó fiar nafatin bá ita nian amu sira no agredese mós bá amu Marco Frizi  nian kontribuisaun iha vizita sua santidade amu papa mai Timor-Leste,”Dehan  Deputadu Romeo Moises iha nian intervensaun Plenária.

Iha sorin seluk Deputada Bankada FRETILIN, Nurima Ribeiro Alkatiri hateten,  hakarak hato’o respeitu no agradese tomak  bá Amu Marco Sprizzi ne’ebé mak hala’o ona servisu iha Timor-Leste maské reprezenta relijiaun katoliká, maibé seim halo deskriminisaun bá sidadaun sira husi relijiaun sira seluk.

“Nune’e ha’u hakarak hato’o votu louva no agradesimentu ida-ne’e hodi FRETILIN nian naran, relijiaun islam nian naran no ha’u nian naran,” Deputada Nurima hateten.

Iha fatin hanesan Mgr. Marco Sprizzi hateten, ohin mai Parlamentu Nasionál  hodi despedida no obrigadu bá  momentu furak durante tinan neen  halo misaun  iha Timor-Leste hanesan reprezentante Santasé Vatikanu hosi Santu Padre Papa Fransisco iha Timor-Leste.

“Liuhosi Parlamentu Nasonál  hato’o  obrigadu bá parte hotu-hotu  ne’ebé durante ne’e servisu hamutuk  ona, ha’u mós haksolok no obrigadu tanba Parlamentu Nasional sempre kolabora ho Santasé Vatikanu iha Timor-Leste,”Hateten Amo Marco Sprizzi hafoin halo despede iha PN.

 Jornalista Estajiária: Zita Menezes