Membru Bankada CNRT Preokupa Hasai Raan iha HNGV Lori Bá Análize iha DMC

Hatutan.com, (17 Marsu 2025), Díli– Membru Parlamentu Nasionál (PN) husi Bankada CNRT, Deputada Angela Maria Corvelo de Andrade Sarmento, preokupa ho atendimentu servisu no ekipamentu iha Ospitál Nasionál Guido Valadares (HNGV).

Lee Mós: Setór Saúde Problema Tanba Inkapasidade Governasaun Xanana iha Planeamentu no Jestaun

Logotipu DMC/Espesiál

Liuhusi plenária PN, Segunda (17/03/2025), Deputada Angela Maria Corvelo de Andrade Sarmento iha nia intervensaun preokupa tanba nia rasik haree ho matan oinsá pasiente barak halo teste raan no hasai raan iha HNGV lori ba klínika Dili Medical Center (DMC) mak halo análize.

“Ha’u, horiseik,  liuhosi HNGV iha pasiénte barak ne’ebé mak presiza halo teste raan, maibé hasai tiha raan lori fali bá kliniká DMC mak halo fali análize, seraké HNGV ne’e laiha ekipamentu ka laiha tekniku sira atu halo manutensaun bá ekipamentu sira ne’e ka oinsá,” Angela Maria Corvelo hateten.

Nia preokupa tanbasá mak makina sira ne’e falla; orsida dehan laiha gas  no orsida dehan CitiScan mak aat.

“Husu tebes bá Governu haree asuntu sira ne’e seriú tanba ita bele halo buat hotu-hotu bá ema, maibé vida ema nian, sasan sira ne’e falla ema bele lakon vida saugati de’it. Husu tebes-tebes husi fuan ho laran atu hadi’a setór Saúde tanba nia liga bá ema nian vida,” Deputada Angela Maria Corvelo afirma.

Iha sorin seluk Deputadu Bankada FRETILIN, Florentino Ximenes Sinarai hateten, setór Saúde ne’e kolapsu no aat bá bei-beik.

“Vise-Ministru Asuntu Parlamentár, Ministra Saúde Elia Amaral ne’e  labele hasai ka nia halo servisu saúde kolapsu no aat ba beibeik,” Deputadu Sinarai hateten.

Iha fatin hanesan Vise-Ministru Asuntu Parlamentár Adérito da Costa Hugo hatán katák kona-bá preokupasaun Deputadu/a sira nian liga ho Óspital Nasionál Guido Valadares (HNGV) no Setór Saúde ne’e nia parte sei envia asuntu hirak ne’e bá Ministériu Saúde atu bele fó esplikasaun detallu.

Jornalista Estajiária: Zita Menezes