Connect with us
Pakote Ahi

Polítika

Setór Saúde Problema Tanba Inkapasidade Governasaun Xanana iha Planeamentu no Jestaun

Published

on

Hatutan.com, (08 Jullu 2024), Díli Tuir análize no levantamentu husi Bankada Parlamentár FRETILIN nian, katak  setór saúde daudaun ne’e tama iha situasaun kolapsu tanba  inkapasidade husi IX Governu ne’ebé lidera husi Primeiru-Ministru (PM), Kay Rala Xanana Gusmão iha planeamentu no jestaun.  

Lee Mós: Ekipa Jurídiku no Auditoria Investiga Hela Informasaun Kona-bá Pasiente Mate iha HNGV

Xefe Bankada FRETILIN iha Parlamentu Nasionál, Aniceto Longuinhos Guterres Lopes. Foto/Dok

“Foin tinan ida mandatu IX Governu (01 Jullu 2023-2024), ita asiste sistema saúde ne’ebé kolapsu enkuantu iha inisiu IX Governu  halo kompromisiu atu garante imediata disponibilidade  medikamentu hotu no nesesesidade ospitál  no sentru saúde sira. Tanba ne’e, iha Orsamentu Retifikativu Parlamentu Nasionál aprová millaun $6 iha Orsamentu Jerál Estadu 2024, Parlamentu Nasionál aprova tan millaun $4.3 maibé krizé  ai-moruk hahú husi Hospitál Nasionál Guido Valadares (HNGV), ospitál Referral to’o sentru saúde no postu saúde sira, situasaun ne’e akontese tanba inkapasidade Governu nian iha planeamentu no jestaun,  tau interese grupu no partidu nian ás liu hodi fó projetu kompra medikamentu bá malu hodi viola tiha Rejime Jurídiku   Aprovizioniamentu (RJA) Timor-Leste nian,” Xefe Bankada FRETILIN,  Aniceto Longuinhos Guterres Lopes  afirma iha deklarasaun politika Bankada FRETILIN iha plenária, Segunda (08/07/2024).

Bankada FRETILIN preokupa ho dezempeñu IX Governu iha mandatu tinan ida nian laran inklui preokupasaun povu nian kona-bá problema saúde, edukasaun no folin foos ne’ebé to’o ohin loron seidauk resolve.

Advertisement

Deputadu Aniceto Longuinhos Guterres Lopes, hateten ohin to’o ona iha primeira legislativa nia rohan, iha VI legislatura ida-ne’e nian,  akompaña  dezenpeñu no prestasaun servisu IX Governu nian, hodi lembra fali iha  loron 01 Jullu 2023 bainhira IX Governu Konstitusionál simu posé Primeiru-Ministru Kay Rala  Xanana Gusmão iha nia diskursu ho lian ás hodi halo komprimisiu bá loron 120, no komprimisiu bá tinan ida nian atu halo “milagre” hodi responde bá  espetativa povu no sosiédade Timorense nian.

Iha diskursu ne’e, Primeiru-Ministru IX Governu Konstitusionál  promete atu elimina imediata  aumentu impostu ne’ebé aprová iha Governu anteriór ho objetivu atu hatuun ká kontrola folin nesesidade bazíka iha merkadu, liuliu folin foos iha merkadu, impostu hatuun duni nune’e mós Parlamentu Nasionál ida-ne’e aprová Orsamentu Retifikavu 2023 ho urjénsia  hodi aloka millaun $4 atu halo intervensaun bá folin foos iha merkadu,  realidade mak tinan ida ona folin foos ás ba bebeik no povu kbiit laek halerik nafatin kona-ba foos folin.

Bankada FRETILIN hateten katák IX Governu politiza rekrutamentu bá profesionais saúde, hodi hasai Timoroan ne’ebé iha esperénsia no servi tinan barak ona, hatama fali militante no kuadru ne’ebé laiha esperénsia no seidauk iha lisensa profesionál bá servisu, ikus mai afeta bá sistema saúde kolapsu, hodi  afeta ema mate barak ho numeru bo’ot.

Tuir  dadus ne’ebé Bankada FRETILIN iha katak fulan-Janeiru 2024 ema mate hamutuk 189,  primeira vez akontese  iha istória Timor-Leste nian, IX Governu nia ukun mak hasai record  ida-ne’e no Governu la liga husik deit situasaun ida ne’e kontinua akontese.

Governu ida-ne’e mós, promete atu halo auditoria bá Komisaun Funsaun Públika (KFP) no Inspeção-Geral do Estado, kona-bá rekrutamentu sira iha Governu anteriór, depois Governu tinan-ida, halo dekretu lei Nú.84/2023 kona-bá Estutu Administrasaun Munisipál,  Autoridade Munisipál no Grup Tecnico Interministeriál bá Dezentralizasaun Administrativa, hodi kontra fali lei Nú. 7/2009, lei kriasaun Komisaun Funsaun Públika.

Advertisement

Aktu politika ne’ebé kontraditoria, halo Komisaun Funsaun Públika laiha funsaun, tanba IX Governu dezarma ho dekretu lei numeru 84/2023, hodi ministériu ida-idak livremente halo rekrutamentu tuir gostu polítiku no politiza administrasaun públika, rekrutamentu esesivu hodi hatodan makina estadu maibé prestasaun servisu laiha.

“Faktu konkreta mak rekrutamentu iha Ministériu Administrasaun Estatal/MAE iha VIII Governu iha asesór nain 12 de’it, maibé iha IX Governu  asesór ho tékniku espesializada hamutuk  na’in 137.  Iha VIII Governu rekruta kazuál 864 hodi apoiu servisu bá implementasaun Uma Naroman bá Povu iha teritoriu tomak, iha IX Governu  rekruta kazuá rihun 2.070 halo Ministériu Administrasaun Estatal  nakfilak bá  bazar, kada fulan iha primeira semana, isar bandeira iha  resintu MAE forma fatin la to’o, satan fatin tuur atu halo servisu,” Deputadu Aniceto Guterres haktuir.

Bankada FRETILIN mós observa setór edukasaun iha IX Governu deside la kontinua kontratu bá profesores kontratadu hamutuk 1,499 hodi afeta sistema edukasaun iha Timor-Leste, estudante barak lakon nia direitu bá ensinu apredinsazem  tanba profesores laiha atu hanorin, desizaun polítika ne’ebé la kontribui bá eleva kualidade edukasaun tanba Governu klaramente la kumpri mandatu konstitusionál artigu 59, konstituisaun RDTL garantia direitu ba sidadaun sira atu asesu ba edukasaun.

Lee Mós: Polísia Detein Eis-Profesór Kontratadu Na’in-25, FRETILIN ho PLP Fó Solidariedade

Bankada FRETILIN haktuir depois Ministériu Edukasaun rekruta fali kazuál no asesór hodi butuk iha Ministériu Edukasaun hanesan. Hanesan komparasaun de’it, iha VIII Governu  funsionariu kazuais na’in 151 iha timor-laran tomak, entertantu iha IX Governu hatama kazuais hamutuk 589 iha de’it sentral. Iha VIII Governu iha de’it asesór 34 enkuantu IX Governu rekruta asesór 131, maibé nia servisu halo mál interpretasaun bá dekretu lei númeru 31/2023, até orgaun soberanu ida hanesan Parlamentu Nasionál ne’ebé reprezenta sidadaun hotu-hotu aprová resolusaun Nú.15/2024 apoiu Ministériu Edukasaun atu solusiona problema profesores kontratadu sira, maibé Ministériu Edukasaun la implementa, halo Parlamentu Nasionál lakon tiha nia póder hanesan reprezentante povu.

Advertisement

IX Governu mós taka dalan bá povu ki’ik no ki’ak nia oan sira atu asesu ba edukasaun ensinu superior, liu husi aprova diploma ministeriál Nú.11/2024 hodi revoga diploma ministeriál Nú. 9/2021 ne’ebé aprova iha VIII Governu Konstitusionál  hodi fó dalan ba Povu Kiik no kiak nia oan asesu ba edukasaun liu husi Bolsa Hakbiit, Bolsa Meritu no Bolsa ba Veteranu nia oan sira.

Aniceto Guterres afirma tan, durante tinan ida ona IX Governu ida-ne’e hakarak ordena kapitál pais nian, maibé la mai ho planu ida ordenada no laiha kordenasaun, la kria uluk kondisoens molok halo eviksaun, povu barak abandonadu, povu barak lakon sira nia hela fatin, povu barak lakon sira nia rendementu loro-loron, estudante barak lakon sira nia eskola, dezenvolvimentu ida ne’ebé latau ema hanesan prióridade hodi hamosu de’it tirania, hodi aumenta numeru dezempregu no ki’ak iha Timor-Leste.

“Deklarasaun husi Primeiru-Ministru IX Governu Konstitusionál Kay Rala  Xanana Gusmão nian iha media  no públiku katak, IX Governu sei servisu loloos tinan 2025 tanba IX Governu sei foku bá hamoos foer VIII Governu Konstitusionál nian, deklarasaun ida kontraditória ho realidade no koko atu taka falta bá inkapasidade IX Governu Kostitusionál nian. Konfundi sira nian foer ho ema seluk, tanba isin lolon foer hela mak hamoos rai entaun hamoos nunka moos hela de’iit no aumenta foer liután. Ikus liu, hanesan matenek nain sira dehan “ema la tauk atu iha mudansa, maibe ema tauk mak mudansa ne’ebe lori nasaun no nia povu ba inserteza. Saida mak ita asiste ukun tinan ida husi IX Governu mak dizgovernasaun lori inserteza ba ita nian rain, triste tebes,” Aniceto Longuinhos Guterres Lopes hateten.

Iha fatin hanesan Vise-Ministru Asuntu Parlametár Adérito Hugo da Costa haktuir deklrasaun politika iha momentu ida-ne’e hanesan reflesaun, ne’ebé  IX Governu mós halo ninian  reflesaun ho profundu ultimu reflesaun mak IX Governu halo iha jornada orsamentu 2025 iha Ministériu Finansa ne’ebé tekniku sira aprezenta balansu tinan ida nian Ministériu hotu-hotu nian no frakeza no dezempeñu sira seluk no Governu halo mós avalisaun konkreta.

Jornalista Estajiária: Zita Menezes

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Polítika

Rogério Lobato Sei Aprezenta Prova Irregularidade Aviaun ZEESM ho Ró Haksolok Bá Governu

Published

on

Hatutan.com, (19 Jullu 2024), Díli- Prezidente Autoridade Rejiaun Administrativa Espesiál Oé-cusse-Ambeno (RAEOA), Rogério Tiago de Fátima Lobato, sei aprezenta  prova sira kona-bá irregularidade sira  Aviaun ZEESM ho Ró Haksolok atu fasilita Governu halo auditória ba RAEOA.

(more…)

Kontinua Le'e

Polítika

Fidelis Magalhães ho Mericio Akara La Submete Karta Rezignasaun bá PLP no Rejeita Harii Partidu Seluk

Published

on

Hatutan.com, (17 Jullu 2024), Díli- Fidelis Leite Magalhães no Mericio Juvenál dos Reis Akara to’o agora la submete karta rezignasaun ba Partidu Libertasaun Populár (PLP) no sira rejeita informasaun ne’ebé espalla dehan sira atu  harii partidu seluk.

(more…)

Kontinua Le'e

Polítika

Parlamentu Nasionál Resesu Fulan-Rua

Published

on

Hatutan.com, (16 Jullu 2024), Díli– Parlamentu Nasionál (PN) hahú resesu durante fulan-rua (2)  husi loron 16 fulan-Jullu to’o loron 16 fulan-Setembru 2024.

(more…)

Kontinua Le'e
Advertisement

Trending