Bankada CNRT ho KHUNTO Prefere Hadi’a Jestaun E.P ho I.P sira La’ós Taka

Hatutan.com (25 Marsu 2025), Díli-Bankada Parlamentár CNRT prefere atu la taka instituisaun estadu indireta sira, hanesan empreza públiku (E.P) ho institutu públiku (I.P) sira, maibé hadi’a de’it instituisaun sira-ne’e nia jestaun no estatutu.

Lee Mós:  PM Xanana Pronunsia Halo Auditória Bá Instituisaun Estadu Hotu

Tabela salariál ka remunerasaun Kargu Xefia sira iha Institutu Públiku ho Empreza Públiku ne’ebé viral iha Facebook. Foto/Dok

Membru PN husi Bankada CNRT,  Patrocinio Fernandes hateten, E.P ho I.P ne’e servisu akompañamentu Governu nian no Governu mak ezekutivu hodi haree katák EP ho IP sira-nia ezisténsia ne’e bele duni ajuda estadu atu hasa’e despeza estadu nian.

“Sé Primeiru-Ministru to’o iha konkluzaun ida atu muda estatutu, ha’u la dehan taka, tanba ha’u haree katák tuir Primeiru-Ministru atu muda estatutu sira-nia husi empreza públiku husi instituisaun públiku parese sei entrega fali bá diresaun ida iha minstériu sira,” Deputadu Patrocinio Fernandes hateten bá Hatutan.com iha PN, Tersa (25/03/2025).

Nia hatutan parese Primeiru-Ministru haree katák di’ak liu entrega lai servisu sira ne’e bá iha minstériu relevante sira para depois bele kontrola ne’e di’ak liután aumezmu tempu bele sukat iha instituisaun ne’e nian dezempeñu bá despeza sira estadu nian.

Nia esplika bainhira ko’alia kona-bá empreza katák instituisaun indireita estadu nian sira ne’ebé atu tulun estadu hodi hetan reseita barak liu, mais buat ne’ebé  akompaña katák la’ós reseita mak hetan barak liu mais despeza bá orsamenta atividade empreza sira nian ne’e barak liu duké hetan reseita para bele hatama bá kofre estadu.

Iha sorin seluk membru Bankada KHUNTO, Luis Roberto hateten nu’udár Xefe Governu tenke kontrola didi’ak instituisaun hotu ne’ebé estabelese iha rai-laran tantu  E.P no I.P sira.

Nia afirma karik iha elementu no rekursu balu ne’ebé mak simu osan boot mak nia kapasidade la to’o para atu implementa servisu no karik buat ruma ladi’ak xefe Governu tenke foti desizaun halo rotasaun bá rekursu ne’ebé mak servisu internal iha laran, nune’e la bele taka de’it.

“Taka ne’e ladún furak ida tanba ne’e husu bá Primeiru-Ministru atu bele hadi’a jestaun sira ne’e no  nu’udár Deputadu ami la konkorda atu taka I.P ho E.P,” Deputadu Luis Roberto hateten.

Nia hateten durante ne’e insitituisaun sira ho natureza E.P ho I.P iha Timor-Leste ne’e hamutuk 100-itál ne’e miória hotu ne’e fó ona despeza Estadu ne’e hira no iha 25%  de’it mak fó reseita bá estadu, katak seluk ne’e garantia bá orsamentu jerál estadu hotu de’it ne’ebé halo mohu de’it OJE.

Jornalista Estájiaria: Zita Menezes