Tinan-Rua Ona, Jeradór iha Sentru Saúde Gleno La Funsiona

Hatutan.com, (02 Abríl 2025), Díli– Kondisaun jeradór iha Sentru Saúde Gleno, tinan-rua ona la funsiona. Ho nune’e, bainhira ahi eletrisidade mate iha Gleno, prejudika servisu atendimentu saúde nian.  

Lee Mós: Postu Saúde Biseuk Harii iha 2021 ho Kustu $295,785,42 La Utiliza Tanba Kondisaun Aat Total

Atividade balun iha ámbitu inaugurasaun unidade nasionál ba Kuidadu Báziku Emerjénsia Obstetrísia no Neonatolojia, iha Sentru Saúde Gleno, Ermera, iha loron 23 fulan-Abríl tinan 2024,. Foto/Gov.tl

Membru Parlamentu Nasionál husi  Bankada PLP, Adolfo Martins iha reuniaun  Plenária PN,  Tersa (01/04/2025), levanta situasaun  Sentru Saúde Gleno nian ne’e hodi husu atu ministériu kompetente rezolve imediatamente.

“Hakarak atu hato’o preokupasaun Sentru Saúde Gleno nian liuliu bá jeradór ne’ebé mak agora daudaun  tau iha ne’ebá la funsiona, kuazé tinan rua besik tinan tolu ona. Agora kuandu ahi eletrisidade mate pasiénte lubuk ida ne’ebé baixa iha sentru Saúde ne’ebá inklui mós pesoál saúde sira servisu iha ne’ebá uzá de’it lampra telefone nian hodi fó partu bá  inan-feton sira,” Deputadu Adolfo Martins hateten.

Reprezentante povu ne’e afirma dalaruma pasiénte sira uzá hela soru atu bá haris-fatin mós uzá lampra telefone de’it, situasaun ida-ne’e akontese kle’ur ona, la’ós foin mak akontese, nune’e husu Governu atu bele solusiona problema ida-ne’e.

Iha fatin hanesan Vise-Ministru Asuntu Parlamentár Adérito Hugo da Costa promete envia asuntu ne’e bá Ministériu Saúde atu haree situasaun referé

“Lamentavél tebes ho situasaun ih Sentru Saúde Glenu ne’ebé ita hotu hatene, ahi eletrisidade ikus-ikus ne’e mate hela de’it tuir loloos Jestór sira iha óspital labele husik jeradór iha kondisaun aat,” Adérito Hugo hateten.

Jornalista Estajiária: Zita Menezes