Polísia Detein Peregrinu Na’in-Neen Bá Ramelau Lori Atributu Arte-Marsiál

Hatutan.com,  (17 Juñu 2025), Díli– Polísia Nasionál Timor-Leste  Munisípiu Aileu, sábadu liubá (07/06/2025), detein peregrinu na’in-neen iha Aileu tanba lori atributu arte-marsiál nian ba vizita Na’i Feto Ramelau.

Lee Mós: Governasaun Xanana Kontínua Suspende Atividade Arte-Marsiál To’o 31 Dezembru 2025

Prezidente KRAM, Octavio da Conceição hatudu prova sira atributu arte-marsiál nian ne’ebé partikante sira kontinua utiliza. Foto/Juvinal Cabral dos Santos

Peregrinu na’in-neen ho idade joven de’it ne’e lori motór sai husi Díli atu ba Ramelau, maibé bainhira liu iha pasa-revista Polísia  hetan atributu arte-marsiál no halo kedas detensaun tanba konsidera dezobediénsia  ba rezolusaun Governu nian  númeru 22/2025, 7 fulan-Abril, kona-bá medida suspensaun ba atividade ka pratika arte-marsiál iha territóriu nasionál.

Komisaun Reguladora Arte-Marsiál (KRAM) konsidera aktu sira-ne’e viola lei no presiza duni iha medida hosi autoridade atu aplika tuir lei.

“Ha’u bele dehan foin dadauk loron 07 fulan-Juñu, tinan ne’e,  iha Suku Lahae, Postu-Administrativu Aileu, Munisípiu Aileu, Komandu PNTL Aileu halo pasa-revista ba joven sira ne’ebé mak  hakarak halo viajen ba Nossa Señora Ramelau. Polísia  detein  joven sira ne’ebé mak utiliza organizasaun arte-marsiál tanba sira uja sira-nia atributu tau iha pasta laran, depois halo jurus ka hatudu sira nia atrasaun iha estrada laran,” Prezidente KRAM, Octavio da Conceição hateten iha konferénsia imprensa, Tersa (17/06/2025).

Iha fulan sira ikus ne’e mós KRAM rekolla informasaun katak autoridade Polísia halo operasaun konjunta no deteta membru arte-marsiál sira kontinua la kolabora hodi pratika atividade ater-marsiál sub-subar.

Iha  Segunda-horiseik, PNTL liuhosi Servisu Migrasaun prende farda lubuk ida husi organizasaun arte-marsiál sira ne’ebé haruka mai husi rai-li’ur.

Prezidente KRAM, Octavio da Conceição hateten, iha publisidade pratikante estudante sekundariu sira ne’ebé halo iha íili laran la utiliza farda, maibe hakerek sira nia organizasaun nia naran iha farda eskola sira ne’e ne’ebé KRAM konsidera hanesan publisidade kontinua la kumpri rezolusaun ne’ebé Governu  nian, nune’e KRAM husu ba diregente eskola sekundariu sira atu kontrola estudante sira ba eskola labele hakerek naran organizasaun arte-marsiál  iha farda eskola nian.

Jornalista: Juvinal Cabral dos Santos