Estudante Timor-oan iha Izraél iha Situasaun Di’ak, Na’in-15 To’o Ona iha Bali

Hatutan.com, (25 Juñu 2025), Díli—Estudante Timor-oan hirak ne’ebé hala’o hela sira-nia estudu iha Izraél iha kondisaun di’ak. Maske nune’e, governu kontinua hlao esforsu atu evakua sira hafoin mosu funu entre Izraél ho Iraun.

Lee Mós: Ramos-Horta Husu Israel-Palestina Halo Negosiasaun Solusiona Konflitu iha Gaza

Vise-Ministra ba Asuntu ASEAN, Milena Maria da Costa Rangel. Foto/Média VIP

Vise-Ministra ba Asuntu ASEAN, Milena Maria da Costa Rangel, hateten Governu kontinua komunika ho estudante Timor-oan sira iha Izraél no daudaun ne’e, estudante Timor-oan  na’in-15 ne’ebé hala’o estudu iha  Arava International Center of Agriculture Training  (AICAT) to’o ona iha Bali-Indonézia atu semana ne’e nia laran to’o ona iha Timor-Leste.

Vise-Ministra  ne’e dehan, relasiona ho funu entre Izraél ho Iraun,  Governu liu-husi Ministériu Negósiu Estranjeiru no Kooperasaun (MNEK) hamutuk ho Embaixada Izraél nian iha Singapura  akredita mai Timor-Leste, koordena malu atu asegura Timor-oan sira-nia viajen mai Timor-Leste.

“Sira ne’e maioria akaba ona sira-nia estudu, ne’ebé hein konklui atu fila. Balun fila ona mai iha Bali. Daudaun iha hela koordenasaun entre ita no Embaixada Izraél nian akredita iha Singapura no iha Timór, tanba akontesimentu sira ne’e ita-nia pontu entrada halo komunikasaun mak ho embaixada,” Vise-Ministra ba Asuntu ASEAN, Milena Maria da Costa Rangel hateten bá jornalista  sira iha Palásiu Governu, Kuarta  (25/06/2025).

Ho situasaun funu entre Izraél no Iraun, Vise Ministra ne’e esplika katak Governu tenta fó oportunidade no akomoda hotu Timor-Oan sira atu fila, maibé ida-ne’e fila-fali bá ida-idak nia desizaun.

“Karik situasaun piór, ita sei koordena ho Embaixada Izraél nian iha Singapura para asegura duni no halo protesaun ba Timor-oan iha Izraél. Governu no Estadu iha responsabilidade tomak atu garante katak sidadaun sira ne’ebé iha Izraél seguru no bele filafali mai,”   Milena Maria da Costa Rangel  hateten.

Jornalista: Marcelino Tomae