Hatutan.com, (07 Novembru 2023), Díli- Prezidente Repúblika (PR), José Ramos-Horta, husu ba lider sira nasaun Israel no Palestina hamutuk ho Konsellu Seguransa Nasoins Unidas (KS-ONU) atu promove negosiasaun no diálogu hodi harii pás no solusiona imediata konflitu iha Gaza.

Lee Mós: Ramos-Horta Agradese Brunei Darussalam Nia Apoiu Mai Timor-Leste

PR José Ramos-Horta halo palestra iha Universidade Brunei Darusalam, Segunda (06/11/2023). Foto/Média GPR

Prezidente Repúblika José Ramos-Horta iha nia palestra ne’ebé hala’o iha Universidade Brunei Darussalam, Segunda (06/11/2023) hateten, iha diskursu bá Asembleia Jerál iha fulan-Setembru liubá, husu atu haree bá rezolusaun sira hosi Asembleia Jerál ONU nian no Konsellu Seguransa ONU atu tau atensaun ba estadu rua, tanba perpetuasaun bá injustisa ida-ne’e la sustentavel.

“Ami husu ba parte rua ne’ebé envolve iha konflitu atu fila-fali bá meza negosiasaun nian, hodi promove libertasaun imediata bá dadur sira ne’ebé sira kaer iha loron 7 fulan-Outubru  2023 no iha parte seluk, promove asesu bá fornesimentu ai-moruk, ai-han, bee no sasán importante sira seluk hodi tulun vítima sivíl no inosente sira hosi konflitu inumanu ne’ebé ami haree ona iha Gaza,” Prezidente Repúblika José Ramos-Horta haktuir iha komunikadu  imprensa ne’ebé Hatuta.com asesu.

Advertisement

Konkorda ho Five Point Konsensu ASEAN bá Myanmar

Biban ne’e, Ramos-Horta hato’o Timor-Leste nia  preokupasaun boot kona-bá situasaun Myanmar nian, ne’ebé militár sira ne’ebé estratéjia hodi halo violasaun bá direitu umanu ho alvu bá ema sivíl, eskola, igreja no ospitál sira iha nasaun laran tomak.

Ramos-Horta afirma Timor-Leste aliña nia an ho pozisaun konsensu ASEAN nian ho pontu lima (Five Point Consensus ASEAN) no sei hola parte iha ninia implementasaun.

1. Hapara imediata violénsia iha Myanmar
2. Kria diálogu konstrutivu entre parte relevante sira, hodi buka solusaun pasífiku iha Myanmar
3. Enviadu husi ASEAN tenke fasilita prosesu mediasaun ba diálogu ho asisténsia hosi Sekretáriu Jerál ASEAN
4. ASEAN tenke fornese asisténsia umanitária liu hosi sentru asisténsia umanitária bá jestaun dezastre
5. Enviadu espesiál no delegasaun ASEAN tenke vizita Myanmar hodi hasoru malu ho parte importante sira hotu ne’ebé envolve hodi solusiona problema hotu iha Myanmar.

Partisipante sira rona palestra PR Ramos-Horta nian iha Universidade Brunei Darussalam. Foto/Média GPR

Five Point Consensus ASEAN ne’e halo atu povu no lider sira hotu iha ASEAN bele sente duni valór bá direitu umanu atu bele fó respeita tomak ba dignidade umana.

Oartisipa iha palestra refere, membru Governu sira husi Brunei Darussalam nian, estudante sira-ne’ebé estuda iha Universidade Brunei Darussalam, reprezentante Misaun Diplomátiku sira no seluk tan.

Delegasaun Timor-Leste ne’ebé partisipa iha palesta PR Horta nian iha Universidade Brunei Darussalam ne’e kompostu hosi primeiru Vise Primeiru-Ministru, Francisco Kalbuadi Lay, Vise Xefe Estadu Maiór Jenerál Forsas Armadas, Majór Jenerál Calisto dos Santos ‘Coliati’, Embaixadór Timor-Leste bá Brunei Darussalam, Abel Guterres ne’ebé akompaña mós hosi Embaixadór Brunei Darussalam iha Timor-Leste, Wan Hadfi Latif inklui autoridade lokal balun hosi Timor-Leste.

Advertisement

Jornalista: Vito Salvadór